நெல்லை: தந்தை இறந்த சோகத்திலும் தேர்வுக்குச் சென்ற மாணவி

நெல்லை மாவட்டம் திசையன்விளை தாலுகா இட்டமொழி அருகே வடலிவிளை கிராமத்தைச் சேர்ந்தவர் அய்யாதுரை (வயது 55) - பானுமதி தம்பதியினர். இவர்களுக்கு மூன்று மகன்கள், ஒரு மகள். மகள் மதுமிதா இட்டமொழி ஏ.வி. ஜோசப் அரசு மேல்நிலைப் பள்ளியில் பன்னிரெண்டாம் வகுப்பு படித்து வருகிறார். அய்யாதுரை புற்றுநோயால் பாதிக்கப்பட்டு நீண்ட நாட்களாக சிகிச்சை பெற்று வந்த நிலையில் இன்று (மார்ச் 11) அதிகாலை உயிரிழந்தார். 

இந்நிலையில் பன்னிரெண்டாம் படித்து வரும் அய்யாதுரையின் மகள் மாணவி மதுமிதாவிற்கு இன்று +2 கணித பாடத்தில் பொதுத்தேர்வு நடைபெறுகிறது. தந்தை இறந்த நிலையிலும் தந்தையின் பூத உடலை வணங்கி விட்டு மாணவி மதுமிதா இட்டமொழி ஏ.வி. ஜோசப் அரசு மேல்நிலைப் பள்ளிக்கு தேர்வு எழுத சென்றுள்ளார். தந்தை இறந்த சோகத்திலும் லட்சியத்தை நோக்கி பயணம் செய்யும் மாணவியை பொதுமக்கள் பாராட்டி வருகின்றனர்.