மதுரை: இலவச வீட்டு மனை பட்டா கேட்டு பெண்கள் பேரணி

மதுரை மாவட்டத்தில் புறநகர் பகுதிகளைச் சேர்ந்த 10, 000 மேற்பட்டோருக்கு கடந்த சில தினங்களுக்கு முன்பாக அமைச்சர் உதயநிதி ஸ்டாலின் தலைமையில் இலவச வீட்டு மனை பட்டா வழங்கப்பட்டது.

இந்நிலையில் மாநகராட்சி பகுதியில் பல ஆண்டுகளாக அரசு புறம்போக்கு நிலங்களில் வசிக்கும் மக்களுக்கும், குடிசை மாற்று வாரியம் - வீட்டு வசதி வாரிய குடியிருப்பில் வசிக்கும் மக்களுக்கு பத்திரம் - பட்டா வழங்கிட வேண்டும், வீடற்ற ஏழை - எளிய மக்களுக்கு இலவச வீட்டு மனை பட்டா வழங்கிட வேண்டும் எனக் கூறி மதுரை நாடாளுமன்ற உறுப்பினர் சு. வெங்கடேசன் தலைமையில் மார்க்சிஸ்ட் கம்யூனிஸ்ட் கட்சி சார்பில் இன்று 3ஆயிரத்திற்கும் மேற்பட்ட பெண்களை திரட்டி பெருந்திரளாக மனு அளிக்கும் போராட்டம் நடைபெற்றது.

மதுரை அரசு மருத்துவமனை சாலையில் உள்ள இளங்கோ பள்ளி பகுதியில் இருந்து 3ஆயிரத்திற்கும் மேற்பட்ட பொதுமக்களை திரட்டி பேரணியாக அணிவகுத்து வந்தனர்.

இதனையடுத்து பொதுமக்கள் சார்பில் மாவட்ட ஆட்சியரை தான் சந்தித்து முறையிடுவதாக கூறி மதுரை நாடாளுமன்ற உறுப்பினர் மற்றும் மார்க்சிஸ்ட் கம்யூனிஸ்ட் கட்சி நிர்வாகிகள் மாவட்ட ஆட்சியரை சந்திக்க சென்றனர்.

பட்டா கேட்டு பேரணி காரணமாக முன்னெச்சரிக்கை நடவடிக்கையாக ஆட்சியர் அலுவலகத்தில் குறைதீர் கூட்ட நாளில் கேட்களும் அடைக்கப்பட்டதன் காரணமாக மக்கள் தங்களுடைய மனுக்களை வழங்குவதற்கு நீண்ட நேரம் காத்திருந்தனர்.