பாப்பாரப்பட்டியில் பல்வேறு திட்ட பணிகளை ஆட்சியர் ஆய்வு

பாப்பாரப்பட்டி தேர்வுநிலை பேரூராட்சியில் பல்வேறு திட்டங்களின் கீழ் வளர்ச்சி திட்டப்பணிகள் மேற்கொள்ளப்பட்டு வருகிறது. இந்த பணிகளை மாவட்ட ஆட்சியர் சாந்தி இன்று நேரில் பார்வையிட்டு ஆய்வு செய்தார். பேரூராட்சியில் 2023-24-ம் ஆண்டு 15-வது நிதிக்குழு மானியதிட்டத்தின் கீழ் ரூ. 25 லட்சம் மதிப்பீட்டில் நடைபெற்று வரும் சமுதாய கூடம் புனரமைத்தல் பணி மற்றும், 2022-23-ம் ஆண்டு கலைஞர் நகர்ப்புற மேம்பாட்டுத் திட்டத்தின் கீழ் 2 கோடியே 74 லட்சம் மதிப்பீட்டில் வாரச்சந்தை அமைத்தல், அம்ரூத் 2. 0 திட்டத்தின் கீழ் ரூ. 2கோடியே 23 லட்சத்து 50 ஆயிரம் மதிப்பீட்டில் வண்ணான் குட்டை புனரமைத்தல்,

மற்றும் 6-வது நிதிக் குழு மானியத்திட்டத்தின் கீழ் ரூ. 92 லட்சம் மதிப்பீட்டில் கூடுதல் பள்ளி வகுப்பறை கட்டிடம், கழிப்பறை அமைத் தல் பணி, நகர்புற சாலை மேம்பாட்டுத்திட்டத்தின் கீழ் 1 கோடி மதிப்பீட்டில் தார் சாலை, சிமெண்டு சாலை அமைத்தல் ஆகிய பணிகள் நடந்து வருகிறது. இந்த
பணிகளை ஆட்சியர் சாந்தி பார்வையிட்டு ஆய்வு செய்தார்.

பேரூராட்சிக்கு உட்பட்ட பகுதிகளில் 7 கோடியே 19 லட்சத்து 53 ஆயிரம் மதிப்பீட்டில் நடைபெற்று வரும் பல்வேறு வளர்ச்சி திட்டப் பணிகளை கலெக்டர் பார்வையிட்டு ஆய்வு மேற்கொண்டார். இந்த பணிகளை தரமாகவும், விரைவாகவும் முடித்து பொதுமக்கள் பயன்பாட்டுக்கு கொண்டு வர வேண்டும் என அலுவலர்களுக்கு ஆட்சியர் அறிவுறுத்தினார்.