தீபாவளி முன்பதிவு: 130 பேருந்துகளின் பயண சீட்டுகள் விற்றன

தீபாவளி பண்டிகையை முன்னிட்டு அரசு விரைவுப் பேருந்துகளில் முன்பதிவு தொடங்கி வேகமாக இருக்கைகள் நிரம்பி வருகின்றன. சுமார் 130-க்கும் மேற்பட்ட பேருந்து இருக்கைகளுக்கான முன்பதிவு முற்றிலுமாக நிறைவடைந்துள்ளன.

இது தொடர்பாக அரசு விரைவு போக்குவரத்துக் கழக அதிகாரிகள் கூறியது, தீபாவளி பண்டிகையையொட்டி அரசுப் பேருந்துகளின் முன்பதிவு தொடங்கி வேகமாக நடைபெற்று வருகிறது. நடப்பாண்டில் அக். 31-ம் தேதி தீபாவளி கொண்டாடப்படுகிறது.

இதற்கு முந்தைய 2 நாட்களைப் பொறுத்தவரை முன்பதிவு தொடங்கியுள்ள பேருந்துகளின் இருக்கைகள் வேகமாக நிரம்பி வருகின்றன. அக். 29-ம் தேதி பயணிக்க தமிழகம் முழுவதும் 9, 500-க்கும் மேற்பட்டோர் முன்பதிவு செய்துள்ளனர். இதில், சென்னையில் இருந்து பயணிக்க 7, 200-க்கும் மேற்பட்டோர் முன்பதிவு செய்துள்ளனர். இதைத் தொடர்ந்து 30-ம் தேதியும் மாநிலம் முழுவதும் 7, 900-க்கும் மேற்பட்ட இருக்கைகள் முன்பதிவு செய்யப்பட்டுள்ள நிலையில், சென்னையில் இருந்து மட்டும் 5, 900-க்கும் மேற்பட்ட இருக்கைகளின் முன்பதிவு முடிவடைந்துள்ளன.

அரசுப் போக்குவரத்துக் கழக www. tnstc. in இணையதளம் அல்லது டிஎன்எஸ்டிசி செயலி வாயிலாக பேருந்து இருக்கைகளை முன்பதிவு செய்து கொள்ளலாம். இதுதவிர, பேருந்து நிலையங்களில் உள்ள முன்பதிவு மையங்கள் வாயிலாகவும் முன்பதிவு செய்யலாம் என்று அவர்கள் தெரிவித்தனர்.