தஞ்சை: தமிழ் பல்கலைக்கழகத்தில் நூல் வெளியீட்டு விழா

தமிழ்நாடு அரசு, தஞ்சை தமிழ்ப் பல்கலைக்கழகத்திற்கு தமிழ்ப் பண்பாட்டு மரபுகளை ஆய்வு செய்வதற்கு ரூ. 2. 11 லட்சம் ஒதுக்கியது. அந்தத்திட்டத்தின் ஒரு பகுதியாகத் தென் தமிழ்நாட்டில் உள்ள குளங்கள், ஏரிகள், கண்மாய்களின் கரைகளில் குடிகொண்டுள்ள நீர்நிலைத் தெய்வங்கள் குறித்த தரவுகள் சேகரிக்கப்பட்டன. நீர்நிலைகளோடு இருக்கக் கூடிய வளங்களுக்கும், பயிர்களுக்கும், மடைகளுக்கும் கரையோரங்களில் இருக்கக்கூடிய மரங்களுக்கும்  இடையே பல சமூகத் தொடர்புகள் நுணுக்கமாக உள்ளன. 
 
நீர்நிலைகளில் கரைகளில் இருக்கக்கூடிய தெய்வங்கள் கரைகளைப் பாதுகாப்பதோடு மனிதர்களைப் பாதுகாக்கின்றன. இந்தத் தரவுகளையெல்லாம் கள ஆய்வின் வழியாகச் சேகரித்தும், தஞ்சாவூர் தமிழ்ப் பல்கலைக்கழக இந்திய மொழிகள் மற்றும் ஒப்பிலக்கியப்பள்ளியின் இணைப்பேராசிரியர்     முனைவர் இரா. வெங்கடேசன் நூல் ஒன்றை எழுதியுள்ளார்.  
அவர் எழுதிய, ‘நீர் நிலைத் தெய்வங்களும் சமூக மரபுகளும்’ என்ற நூலைத் பல்கலைக்கழகத்தில் வியாழக்கிழமை நடைபெற்ற நிகழ்ச்சியில், தமிழ்ப் பல்கலைக்கழகத் துணைவேந்தர் வி. திருவள்ளுவன் வெளியிட பதிவாளர்(பொ) பெ. இளையாப்பிள்ளை பெற்றுக் கொண்டார்.  
நிகழ்வில் பல்கலைக்கழகப் பேராசிரியர்கள், துறைத் தலைவர்கள், இலக்கிய ஆர்வலர்கள் உள்ளிட்ட பலர் கலந்து கொண்டனர்.