சேலம்: போலி ஆர். சி. புக் தயாரித்து லாரியை விற்ற டிரைவர் கைது

ஈரோடு மாவட்டம் அந்தியூர் எண்ணமங்கலம் பகுதியை சேர்ந்தவர் கணேசன். லாரி உரிமையாளர் இவர் கடந்த ஒரு ஆண்டுக்கு முன்பு 12 சக்கர டாரஸ் லாரியை வாங்கினார். தொடர்ந்து தவணை கட்ட முடியாததால் அவர் லாரியை விற்பனை செய்ய முடிவு செய்தார். சேலம் மாவட்டம் நங்கவள்ளி அருகே வீரக்கல்லை சேர்ந்த லாரி டிரைவர் கார்த்திக்குமார் (வயது 38) தவணையை கட்டிக்கொண்டு லாரியை தான் ஓட்டுவதாக கூறி உள்ளார்.
இதையடுத்து கணேசன் லாரியை அவரிடம் ஒப்படைத்தார். கணேசனுக்கு லாரி வாங்க கடன் கொடுத்தவர்கள் தவணை கட்டவில்லை. இதனால் லாரியை எடுத்து செல்வதாக கூறினர். இதுகுறித்து, கணேசன், கார்த்திக்குமாரிடம் கேட்ட போது லாரி பட்டறையில் இருப்பதாக கூறியுள்ளார். மேலும் விசாரித்த போது என்ஜின் நம்பரை அழித்து போலியாக ஆர். சி. புத்தகம் தயாரித்து கார்த்திக்குமார் லாரியை விற்று மோசடி செய்தது தெரிய வந்தது.
இந்த மோசடி குறித்து கணேசன் நங்கவள்ளி போலீசில் புகார் செய்தார். அதன் பேரில் போலீசார் வழக்குப்பதிவு செய்து கார்த்திக்குமாரை கைது செய்தனர். மேலும் லாரியை போலீசார் மீட்டனர். இந்த மோசடி குறித்து போலீசார் தொடர்ந்து விசாரணை நடத்தி வருகின்றனர்.