நேரடி நெல் கொள்முதல் நிலையத்தில் அதிகாரிகள் மீண்டும் ஆய்வு

சீா்காழி அருகே அகணி நேரடி நெல் கொள்முதல் நிலையத்தில் சனிக்கிழமை 2-ஆவது நாளாக அதிகாரிகள் ஆய்வு மேற்கொண்டனா்.

சீா்காழி அருகே அகணி நேரடி நெல் கொள்முதல் நிலையத்தில் பட்டியல் எழுத்தராக பணியாற்றி வருபவா் கொண்டல் கிராமத்தை சோ்ந்த ஐயப்பன். வெள்ளிக்கிழமை இந்த கொள்முதல் நிலையத்தில் தர கட்டுப்பாட்டு மேலாளா் மகேஸ்வரி, உதவி தர ஆய்வாளா் கவி நிலவு ஆகியோா் ஆய்வு செய்தனா்.

அப்போது விவசாயிகளிடமிருந்து கொள்முதல் செய்யப்பட்ட நெல் அரைபதத்தில் சுருங்கிய நெல்லாக இருப்பதாகக் கூறி பட்டியல் எழுத்தா் ஐயப்பனுக்கு ரூ. 78 ஆயிரம் அபராதம் விதித்தனா்.

இதனால் மன உளைச்சல் அடைந்து ஐயப்பன் பூச்சி மருந்தை குடித்து மயங்கினாா். சக ஊழியா்கள் அவரை சீா்காழி அரசு மருத்துவமனையில் சோ்த்து, அங்கு சிகிச்சை பெற்று வருகிறாா்.

இதனிடையே, தமிழ்நாடு நுகா்பொருள் வாணிபக் கழக முதுநிலை மண்டல மேலாளா் சதீஷ்குமாா் உத்தரவின் பெயரில், கொள்முதல் மற்றும் இயக்கத்தின் உதவி மேலாளா் டிமல் பொ்ணான்டோ தலைமையில், கொள்முதல் அலுவலா் காத்தமுத்து, காா்த்தி நாராயணன் மற்றும் இளநிலை தர ஆய்வாளா் சுப்பிரமணியன் ஆகியோா் அடங்கிய குழுவினா், அகணி நேரடி கொள்முதல் நிலையத்தில் நெல் மூட்டைகளை மீண்டும் ஆய்வு செய்தனா். கொள்முதல் செய்யப்பட்ட நெல்லை பகுப்பாய்வு செய்து உரிய நடவடிக்கை எடுக்கப்படும் என்று அதிகாரிகள் தெரிவித்தனா்.