ஹெல்மெட் அணிந்து பஸ் ஓட்டிய ஓட்டுநர்

ஹெல்மெட் அணிந்து பஸ் ஓட்டிய ஓட்டுநர்


அந்தியூரை சேர்ந்தவர் சதீஷ். இவர், தனியார் பேருந்து ஓட்டுநர். இவர் கடந்த மூன்று வருடங்களுக்கு மேலாக ஈரோட்டில் இருந்து பவானி வழியாக அந்தியூர் அருகே உள்ள சென்னம்பட்டி வரை ஈரோடு - பவானி - மூணுரோடு - ஒலகடம் - வெள்ளிதிருப்பூர் - சென்னம்பட்டி வழித்தடத்தில் தனியார் பேருந்து ஓட்டி வருகிறார். இந்நிலையில், பைக் , ஸ்கூட்டர் போன்ற இரு சக்கர வாகனங்களை ஓட்டி செல்பவர்கள் ஹெல்மெட் அதாவது தலைக் கவசம் அணிந்து செல்ல வேண்டியதன் அவசியத்தை வலியுறுத்தி பொதுமக்களுக்கு குறிப்பாக இரு சக்கர வாகன ஓட்டிகளுக்கு விழிப்புணர்வு ஏற்படுத்தும் விதமாக பேருந்து ஓட்டுநர் சதீஷ், இன்று காலை சென்னம்பட்டியில் இருந்து ஈரோடு வரை தலைக்கவசம் அணிந்து பேருந்து ஓட்டி சென்றார்.
அத்துடன் சதீஷ், பேருந்து நிறுத்தத்தில் பேருந்தை நிறுத்தும் போது அவ் வழியாக செல்லும் பொதுமக்களுக்கு குறிப்பாக இரு சக்கர வாகன ஓட்டிகளுக்கு தலைக்கவசம் அணிந்து இரு சக்கர வாகனங்களை ஓட்ட வேண்டியதன் அவசியத்தை எடுத்துரைத்தார்.
தனியார் பேருந்து ஓட்டுநர் சதீஷின் ஹெல்மெட் குறித்த இந்த விழிப்புணர்வு செயல் பொதுமக்கள் மத்தியில் வரவேற்பையும் பாராட்டையும் பெற்றுள்ளது.