திண்டுக்கல்: தலைமை ஆசிரியர் சங்கம் சார்பில் ஐம்பெரும் விழா

தமிழ்நாடு உயர்நிலை மற்றும் மேல்நிலைப்பள்ளி தலைமை ஆசிரியர் சங்கம் சார்பில் பதவி உயர்வு பெற்ற தலைமை ஆசிரியர்களுக்கு பாராட்டு, டாக்டர் ராதாகிருஷ்ணன் விருது பெற்ற தலைமை ஆசிரியருக்கு பாராட்டு, பணி மாறுதல் பெற்ற தலைமை ஆசிரியர்களுக்கு பாராட்டு, நல்லாசிரியர் மற்றும் ஆசிரியர் செம்மல் விருது பெற்ற தலைமை ஆசிரியருக்கு பாராட்டு, அரசு பொது தேர்வில் சாதனை புரிந்த மாணவர் மாணவர்களுக்கு பாராட்டு, என ஐம்பெரும் விழா நேருஜி நகரவை மேல்நிலைப் பள்ளியில் நடைபெற்றது.
மாவட்டத் தலைவர் வேளாங்கண்ணி, மாவட்ட செயலாளர் ராஜா தலைமை வகித்தனர். மகளிர் அணி செயலாளர் தெய்வானை, நிர்வாகிகள் சண்முகநாதன் அருள் செல்வன் முன்னிலை வகித்தனர். மாவட்ட அமைப்புச் செயலாளர் வயநமசி வரவேற்றார்.
சிறப்பு விருந்தினர் கலந்து கொண்ட மாநிலத் தலைவர் அன்பரசன் வாழ்த்துரை வழங்கினார்.
மாநில பொதுச் செயலாளர் மாரிமுத்து, முன்னாள் மாநில பொதுச் செயலாளர் அருள் சுந்தரராஜன், முன்னாள் மாநில தலைவர்கள் சத்தியமூர்த்தி, பீட்டர் ராஜா உட்பட பலர் கலந்து கொண்டு பேசினர். திருப்பூர் கல்வி மாவட்ட அலுவலர் காளிமுத்து, புதுக்கோட்டை மாவட்ட கல்வி அலுவலர் லீலாவதி, உலுப்பக்குடி அரசு மேல்நிலைப்பள்ளி தலைமை ஆசிரியர் லட்சுமி ஏற்புரை நிகழ்த்தினர். நிகழ்ச்சியில் 70-க்கும் மேற்பட்ட தலைமை ஆசிரியர்கள் கலந்து கொண்டனர். நிர்வாகி வெங்கடேசன் நன்றி கூறினார்.