சிறுமுகை: நாயை வேட்டையாடிய சிறுத்தை!

கோவை மாவட்டம் மேட்டுப்பாளையம் அருகே உள்ள மோத்தேபாளையம் கிராமத்தில் வீட்டில் இருந்த நாயை சிறுத்தை வேட்டையாடி சென்ற சம்பவம் பெரும் பரபரப்பை ஏற்படுத்தியுள்ளது. இச்சம்பவம் தொடர்பான வீடியோ காட்சிகள் வெளியாகி பரபரப்பை ஏற்படுத்தியுள்ளது. சிறுமுகை வன சரகத்திற்கு உட்பட்ட மோத்தேபாளையம் கிராமத்தில் மோகன் என்பவர் வசித்து வருகிறார். சென்னாமலை கரடு வனப்பகுதியை ஒட்டி அமைந்துள்ள இவரது வீட்டில் நாய் ஒன்றினை வளர்த்து வந்துள்ளார். இந்நிலையில், இரவு நேரத்தில் ஒரு சிறுத்தை மோகனின் வீட்டின் காம்பவுண்ட் சுவரைத் தாண்டி உள்ளே நுழைந்துள்ளது. வீட்டின் உள்ளே அங்குமிங்கும் நடமாடிய சிறுத்தை, பின்னர் வீட்டில் இருந்த நாயைக் கவ்விக் கொண்டு அங்கிருந்து வெளியேறியுள்ளது. இந்த சம்பவம் வீட்டில் பொருத்தப்பட்டிருந்த கண்காணிப்பு கேமராவில் பதிவாகியுள்ளது. அண்மைக் காலமாக மோத்தேபாளையம் கிராமத்தில் குடியிருப்புகளுக்குள் நுழைந்து ஆடு, மாடு போன்ற கால்நடைகள் மட்டுமின்றி நாய்களையும் சிறுத்தைகள் வேட்டையாடும் சம்பவங்கள் அதிகரித்துள்ளன. இது அந்தப் பகுதி மக்களிடையே பெரும் அச்சத்தையும் அதிர்ச்சியையும் ஏற்படுத்தியுள்ளது இந்த சம்பவம் தொடர்பாக வனத்துறை அதிகாரிகள் விசாரணை மேற்கொண்டு வருகின்றனர். மேலும், அப்பகுதியில் மக்களின் பாதுகாப்பை உறுதி செய்யும் வகையில் தகுந்த நடவடிக்கைகள் எடுக்கப்படும் என நேற்று தெரிவித்துள்ளனர்.