சென்னை: பேருந்தில் இருந்து கழன்று விழுந்த டீசல் டேங்கால் பரபரப்பு

பிராட்வேயில் இருந்து கோவளம் நோக்கி சென்ற சாதாரண கட்டண பேருந்தில், நேற்று 40க்கும் மேற்பட்டோர் பயணம் செய்தனர். பேருந்து மெரினாவை கடந்து நொச்சிகுப்பம் சர்வீஸ் சாலை வழியாக செல்லும் போது, திடீரென டீசல் டேங்க் கழன்று விழுந்தது.

சத்தம் கேட்டு ஓட்டுநர் பேருந்தை நிறுத்தினார். பயணியர் உடனடியாக இறக்கி விடப்பட்டனர். பின், மாற்று பேருந்தை ஏற்பாடு செய்து பயணியரை அனுப்பி வைத்தனர். இதையடுத்து, டீசல் டேங்க் கழன்று விழுந்த பேருந்தை, அருகில் உள்ள பணிமனைக்கு கொண்டு சென்றனர். சென்னை மாநகர போக்குவரத்து கழகம் சார்பில், 650க்கும் மேற்பட்ட வழித்தடங்களில், 3, 200க்கும் மேற்பட்ட பேருந்துகள் இயக்கப்பட்டு வருகின்றன.