காவேரிப்பாக்கத்தில் கடையில் பிரிட்ஜ் வெடித்து தீ விபத்து

காவேரிப்பாக்கம் அடுத்த மேலபுலம்புதூர் பேருந்து நிறுத்தத்தில் ஸ்வீட் கடை ஒன்று உள்ளது. இந்த கடையின் உரிமையாளர் வழக்கம்போல் வியாபாரத்தை முடித்து விட்டு கடையை பூட்டிக்கொண்டு வீட்டிற்கு சென்றுள்ளார்.

இந்நிலையில் கடையில் இருந்து புகை வந்துள்ளது. இதை எதிரே உள்ள டீ கடைக்காரர் பார்த்து தகவல் தெரிவித்துள்ளார். தகவல் அறிந்து கடைக்கு விரைந்து வந்து கடையை திறந்து பார்த்தபோது பிரிட்ஜ் வெடித்து உள்ளே இருந்த பொருட்கள் முழுவதும் எரிந்து இருந்தது. 

இதனையடுத்து ராணிப்பேட்டை தீயணைப்பு துறையினருக்கு தகவல் தெரிவித்துள்ளார். காவேரிப்பாக்கம் போலீசார் மற்றும் தீயணைப்பு துறையினர் சம்பவ இடத்திற்கு விரைந்து வந்து, தண்ணீர் பீச்சி அடித்து தீயை அணைத்தனர். மேலும் இந்த தீ விபத்துக்கான காரணம் குறித்து காவேரிப்பாக்கம் போலீசார் விசாரணை நடத்தி வருகின்றனர்.