வேலூர்: கொள்ளையடிக்க வீடுகளை நோட்டமிட்ட முகமூடி கும்பல்

வேலூர் மாவட்டம் காட்பாடி சில்க்மில் பஸ் நிறுத்தம் அருகே உள்ள திருநகர் பகுதியில், தனியார் ஆஸ்பத்திரியில் வேலை செய்யும் நர்ஸ் குடும்பத்தினர் வசித்து வருகின்றனர்.
நேற்று (நவ.1) அதிகாலை 2. 30 மணி அளவில் அவர்களது வீட்டின் பின்புறத்தில் இருந்து சத்தம் கேட்டது. சத்தத்தை கேட்ட நர்ஸ் குடும்பத்தினர் விளக்கு போட்டுவிட்டு பின்புறம் சென்று பார்த்தனர்.

அப்போது சிலர் ஓடுவதை கண்டனர். அவர்களது வீட்டில் பொருத்தப்பட்டு இருந்த கண்காணிப்பு கேமராவை ஆய்வு செய்தபோது முகமூடி அணிந்த 4 பேர் கொண்ட அடையாளம் தெரியாத கும்பல் வீட்டின் பின் பகுதியில் சுற்றி வந்தது பதிவாகி இருந்தது.
இதனால் அச்சமடைந்த அந்த குடும்பத்தினர் இதுகுறித்து 100-க்கு தகவல் தெரிவித்தனர். போலீசார் சம்பவ இடத்திற்கு சென்று அந்தப்பகுதியில் உள்ள தெருக்களில் சுற்றிப் பார்த்தனர். முகமூடி அணிந்து வந்த 4 பேர் கும்பல் அந்த பகுதியில் இருந்து தப்பிச்சென்றது தெரியவந்தது.

முகமூடி கும்பல் இரண்டு, மூன்று தெருக்களில் இரவு முழுவதும் சுற்றித்திரிந்து வீடுகளை நோட்டமிட்டது பல்வேறு கண்காணிப்பு கேமராக்களில் பதிவாகி இருந்தது தெரியவந்தது. கண்காணிப்பு கேமராக்களில் பதிவான காட்சிகளை வைத்து முகமூடி கொள்ளை கும்பலை போலீசார் தேடி வருகின்றனர்.

காட்பாடி பகுதியில் முகமூடி கும்பல் கொள்ளை முயற்சியில் ஈடுபட்ட சம்பவம் பரபரப்பை ஏற்படுத்தி உள்ளது.