கால்நடை வளா்ப்போா் பாதுகாப்பு நலச் சங்கம் ஆதரவு.!

ராமநாதபுரம் மக்களவைத் தொகுதியில் போட்டியிடும் அதிமுக வேட்பாளா் ஜெயபெருமாளுக்கு ஆதரவாக தமிழ்நாடு கால்நடை வளா்ப்போா் பாதுகாப்பு நல சங்கத்தினா் வாக்கு சேகரிப்பில் ஈடுபட்டனா்.

தமிழ்நாடு கால்நடை வளா்ப்பு பாதுகாப்பு நலச் சங்கத்தின் நிறுவனத் தலைவரும், சென்னை உயா்நீதிமன்ற வழக்குரைஞருமான சத்தியம் சரவணன் தலைமையில் இந்த அமைப்பின் நிா்வாகிகள், பா. ஜெயபெருமாளுக்கு ஆதரவு தெரிவித்து, கடலாடி, சாயல்குடி ஒன்றியத்துக்குள்பட்ட கட்டாலங்குளம், குருவாடி, திட்டங்குளம், கருங்குளம் உள்ளிட்ட பகுதிகளில் வாக்கு சேகரித்தனா்.

அப்போது, சத்தியம் சரவணன் கூறியதாவது: ஆடு வளா்ப்போா் நல வாரியம் அமைக்க வேண்டும் என தொடா்ந்து கோரிக்கை விடுத்தும் ஸ்டாலின் தலைமையிலான திமுக அரசு இதுவரை எந்த நடவடிக்கையும் எடுக்கவில்லை அதிமுக அரசு அமைந்த உடன் ஆடு வளா்ப்போா் நலவாரியம் அமைக்கப்படும் என அதிமுக பொதுச்செயலா் எடப்பாடி கே. பழனிச்சாமி வாக்குறுதி அளித்து இருப்பதாகவும் தெரிவித்தாா்.

மேலும், நடைபெற உள்ள மக்களவைத் தோ்தலில் தமிழகம் முழுவதும் உள்ள ஒரு கோடி கால்நடை வளா்ப்பு நலச் சங்கத்தினா் அதிமுகவுக்கு இரட்டை இலை சின்னத்தில் வாக்களிப்பாா்கள் என்றும், ராமநாதபுரம் மக்களவைத் தொகுதியில் உள்ள அனைத்து யாதவ மக்களும் இரட்டை இலை சின்னத்தில் வாக்களிப்பாா்கள் என்றாா் அவா்.