திருச்சியில் நடந்த அதிமுக நிர்வாகிகள் ஆலோசனை கூட்டம்

திருச்சி மாநகர் மாவட்ட ஜங்ஷன் பகுதி அதிமுக நிர்வாகிகள் ஆலோசனைக் கூட்டம் திருச்சி கருமண்டபத்தில் உள்ள மண்டபத்தில் நடைபெற்றது. கூட்டத்திற்கு மாநகர் மாவட்ட செயலாளர் ஜெ. சீனிவாசன் தலைமை தாங்கி பேசும்போது வருகின்ற 2026ம் ஆண்டு சட்டமன்ற தேர்தலுக்கு நாம் நம்மை தயார் படுத்தி கொள்ள வேண்டும் என்று பொதுச் செயலாளர் எடப்பாடி பழனிச்சாமி அறிவுறுத்தியுள்ளார். அதன்படி நாம் அனைவரும் ஒன்றிணைந்து செயல்பட வேண்டும். வருகின்ற தேர்தலில் எடப்பாடி பழனிச்சாமி முதலமைச்சராக பாடுபட வேண்டும் என்று பேசினார்.

கூட்டத்தில் முன்னாள் அரசு கொறடாவும் அமைப்பு செயலாளருமான மனோகரன் பேசுகையில், திமுக குடும்ப ஆட்சி நடத்தி வருகிறது. ஆனால் அதிமுக ஏழை மக்களுக்கான ஆட்சியை நடத்தி வந்தது. இன்றைக்கு திமுக ஆட்சியால் பொதுமக்கள் அதிகளவு பாதிக்கப்பட்டு உள்ளார்கள். இவர்களுக்கு வருகின்ற தேர்தலில் பொதுமக்கள் பாடம் புகட்டுவார்கள். மேற்கு தொகுதியில் ஏற்கனவே இரண்டு முறை அதிமுக வெற்றி பெற்று உள்ளது. வருகின்ற சட்டமன்ற தேர்தலில் மேற்கு தொகுதியில் வெற்றி பெற நாம் அனைவரும் ஒன்றிணைந்து பாடுபட வேண்டும். அடுத்து அதிமுக ஆட்சி எடப்பாடி தலைமையில் அமைய நாம் அனைவரும் ஒன்றிணைந்து பாடுபட வேண்டும் என்று பேசினார்.