சேலம்: விவசாயியை சுத்தியால் தாக்கிய கல்லூரி பேராசிரியர் கைது

சேலம் மாவட்டம் சங்ககிரி அருகே பச்சாம்பாளையம் லோட்டஸ் சிட்டி பகுதியை சேர்ந்த பூபதி (வயது 50). விவசாயி. அதேபகுதியை சேர்ந்த தனியார் கல்லூரி பேராசிரியர் ராஜ்குமார் (45) என்பவர் வசித்து வருகிறார். ராஜ்குமாருக்கும், அவருடைய மனைவி நிஷாவுக்கும் குடும்ப தகராறு இருந்து வந்ததாக தெரிகிறது. 

இதையடுத்து பக்கத்து வீட்டை சேர்ந்த பூபதி, அவரது மனைவி ஆகியோர் ராஜ்குமார் வீட்டிற்கு சென்று சமாதானம் செய்தனர். நேற்று முன்தினம் ராஜ்குமார், பூபதி வீட்டுக்கு சென்று தகாத வார்த்தையால் திட்டி அவருக்கு கொலை மிரட்டல் விடுத்ததாக தெரிகிறது. மேலும் தான் மறைத்து வைத்திருந்த சுத்தியால் பூபதியின் தலை மீது தாக்கியதாக கூறப்படுகிறது. 

அதில் படுகாயம் அடைந்த பூபதியை அக்கம் பக்கத்தினர் மீட்டு ஈரோடு தனியார் மருத்துவமனைக்கு அனுப்பி வைத்தனர். அங்கு அவருக்கு சிகிச்சை அளிக்கப்படுகிறது. இது குறித்த புகாரின் பேரில் சங்ககிரி போலீசார் வழக்குப்பதிவு செய்து ராஜ்குமாரை கைது செய்தனர்.