சேலம்: கிரிக்கெட் சங்க ஆண்டு விழா; கிரிக்கெட் வீரர் நடராஜன் பங்கேற்பு

சேலம் மாவட்ட கிரிக்கெட் சங்க 64-ம் ஆண்டு விழா நேற்று(அக்.05) சேலத்தில் உள்ள ஒரு ஓட்டலில் நடைபெற்றது. இதற்கு சங்க தலைவர் பிரகாஷ் தலைமை தாங்கினார். செயலாளர் பாபுகுமார் முன்னிலை வகித்தார். தமிழ்நாடு கிரிக்கெட் சங்க துணை செயலாளர் பாபா, முன்னாள் செயலாளர் ராமசாமி ஆகியோர் கலந்து கொண்டு பேசினர். சிறப்பு அழைப்பாளராக ஜே. எஸ். டபிள்யூ நிறுவன பொது மேலாளர் அரிராஜ் கலந்து கொண்டு கிரிக்கெட் வீரர் நடராஜன் மற்றும் வீரர், வீராங்கனைகளுக்கு கேடயம் வழங்கினார்.

விழாவில் கிரிக்கெட் வீரர் நடராஜன் கலந்து கொண்டு பேசும் போது, சேலத்தில் தற்போது அனைத்து வசதிகளுடனும் கிரிக்கெட் மைதானம் அமைந்து உள்ளது. பயிற்சியாளரிடம் சந்தேகத்தை கூச்சமின்றி கேட்க வேண்டும். நம்மிடம் திறமைக்கு பஞ்சம் இல்லை. அதை எப்படி வளர்த்துக்கொள்வது என்பது தான் முக்கியம்.

தன்னம்பிக்கையை விட்டு விடக்கூடாது. பஸ் பீஸ், சாப்பாடு இல்லாமல் விளையாடினேன். எனவே என்னை (நடராஜன்) போன்று நிறைய பேர் சேலத்தில் இருந்து வர வேண்டும். விளையாட்டு வீரர்கள் உடலை கட்டுக்கோப்பாக வைத்துக்கொள்ள வேண்டும்’ என்றார். இந்த விழாவில் கிரிக்கெட் சங்க நிர்வாகிகள் உள்பட பலர் கலந்து கொண்டனர்.