சேலம்: ஆணைவாரி நீர்வீழ்ச்சியில் ஆர்ப்பரித்து கொட்டும் தண்ணீர்

சேலம் மாவட்டம், ஆத்தூர் அருகே கல்லாநத்தம் ஊராட்சியில் முட்டல் கிராமம் கல்வராயன் மலை அடிவாரத்தில் அமைந்துள்ளது. இங்கு ஆணைவாரி நீர்வீழ்ச்சி மற்றும் முட்டல் ஏரி வனத்துறையின் சூழல் சுற்றுலா திட்டத்தின் கீழ் செயல்பட்டு வருகிறது.

முட்டல் ஏரியில் படகு சவாரி மற்றும் நீர்வீழ்ச்சியில் சுற்றுலாப் பயணிகள் குளிக்கும் வசதி வனப்பகுதியில் பொழுதுபோக்கு வகையில் குடில் பூங்கா மற்றும் சிறுவர்கள் விளையாட வசதிகள் செய்யப்பட்டுள்ளன. ஆத்தூர் மட்டுமின்றி கள்ளக்குறிச்சி, பெரம்பலூர், சேலம் விழுப்புரம், கடலூர் உள்ளிட்ட பகுதியிலிருந்து ஏராளமான சுற்றுலா பயணிகள் ஆணைவாரி நீர்வீழ்ச்சிக்கு வருகை தந்து விடுமுறை நாட்களில் தனது குடும்பத்துடன் குளித்து மகிழ்ந்து வந்தனர்.

இந்நிலையில் கடந்த இரண்டு நாட்களாக கோடை வெயிலின் தாக்கம் வாட்டி வதைத்து வந்த நிலையில் நீர்வீழ்ச்சியில் தண்ணீர் குறைந்து காணப்பட்டு வந்தது. நேற்று இரவு விடிய விடிய பெய்த கன மழையில் ஆணைவாரி நீர்வீழ்ச்சிக்கு தண்ணீர் வரத்து அதிகரித்தது. தொடர்ந்து கல்வராயன் மலைப்பகுதியிலும் கன மழை பெய்து வருவதால் ஆணைவாரி நீர்வீழ்ச்சியில் தற்போது நீர்வரத்து அதிகரித்து ஆணைவாரி நீர்வீழ்ச்சியில் ஆர்ப்பரித்த கொட்டி வருகிறது.

இந்நிலையில் இன்றும் சுற்றுலாப் பயணிகளுக்கு குளிக்க வனத்துறை அனுமதி வழங்கியதால் சுற்றுலாப் பயணிகள் மகிழ்ச்சி அடைந்து உள்ளனர்.