அன்னூர்: காரின் மீது மரம் விழுந்து விபத்து!

மேட்டுப்பாளையம் அன்னூர் சாலையில் நடூர் பகுதியில் இன்று சாலையோர ராட்சத மரம் முறிந்து கார் மீது விழுந்து விபத்து ஏற்பட்டது. அதிர்ஷ்டவசமாக காரில் பயணித்த சிங்காநல்லூர் பகுதியைச் சேர்ந்த மூன்று பேர் உயிர் தப்பினர். கோவை சிங்காநல்லூர் பகுதியைச் சேர்ந்த சுஜித் அவரது மனைவி லில்லி, மகள் தியா ஆகிய மூவரும் தங்களது சொகுசு காரில் மேட்டுப்பாளையத்தில் உள்ள தனது நண்பர் வீட்டுக்கு சென்று கொண்டிருந்தனர். அப்போது நடூர் என்ற இடத்தில் கார் சென்று கொண்டிருந்த நிலையில், வடகிழக்கு பருவமழை காரணமாக திடீரென சாலையோர ராட்சத மரம் முறிந்து கார் மீது விழுந்தது. திடீரென மரம் உடைந்து கார் மீது விழுந்ததில் மூன்று பேரும் காருக்குள் சிக்கிக் கொண்டனர். விபத்தை நேரில் பார்த்த பொதுமக்கள் உடனடியாக ஓடி வந்து காரில் மாட்டிக் கொண்டிருந்த மூவரையும் பத்திரமாக மீட்டனர். இந்த விபத்தில் காரின் முன் பகுதி மற்றும் நடுப்பகுதி சேதம் அடைந்தது. சம்பவம் குறித்து மேட்டுப்பாளையம் போலீசாருக்கு தகவல் அளிக்கப்பட்டது. மேட்டுப்பாளையம் காவல்துறையினர் பொதுமக்களுடன் இணைந்து காரை மீட்கும் பணியில் ஈடுபட்டனர். கடந்த சில மாதங்களுக்கு முன்பு மேட்டுப்பாளையம் உதகை சாலையில் இதேபோல மரம் முறிந்து விழுந்து ஒரு கார் சேதமடைந்த நிலையில், இரண்டாவது முறையாக மேட்டுப்பாளையத்தில் நடைபெற்ற இந்த சம்பவம் அதிர்ச்சியை ஏற்படுத்தியுள்ளது.