சென்னை: நான் முதல்வன் திட்டம் - முதல்வர் ஸ்டாலின் பெருமித ட்வீட்

உலக அரங்கில் மிளிரும் இளந்தலைவர்களை நான் முதல்வன் திட்டம் வாயிலாக நாம் வளர்த்தெடுத்து வருகிறோம் என நான் முதல்வன் திட்டத்தின் செயல்பாடு தொடர்பாக முதல்வர் மு. க. ஸ்டாலின் பெருமிதம் தெரிவித்துள்ளார். ஐபிஎம் நிறுவனத்தைச் சேர்ந்த தேவ்காந்த் அகர்வால் தனது பதிவில், நான் முதல்வன் திட்டத்தின் கீழ் செயல்படுத்தப்படும், நாளைய திறன் திட்டம் குறித்தும், அதில் மாணவர்களுக்கு அளிக்கப்படும் பயிற்சி குறித்தும் விளக்கியுள்ளார். 

இந்நிலையில், இந்த இரு பதிவுகளையும் சுட்டிக்காட்டி 'நான் முதல்வன்' திட்டத்தின் வெற்றி குறித்து முதல்வர் ஸ்டாலின் வெளியிட்டுள்ள பதிவில், 'தமிழகத்தின் முதல்வராகவும் ஒரு பெருமைமிகு பெற்றோராகவும் நமது இளைஞர்களின் அறிவுத்திறன் அங்கீகாரம் பெறுவது கண்டு எனது நெஞ்சம் பெருமித உணர்வால் நிறைகிறது. என் நெஞ்சுக்கு நெருக்கமான 'நான் முதல்வன்' திட்டத்தின் வாயிலாக உலக அரங்கில் மிளிரும் இளந்தலைவர்களை நாம் வளர்த்தெடுத்து வருகிறோம். நமது இளைஞர்கள் நிமிர்ந்து நின்று, உலகை வெற்றிகொள்ளவும் முன்னடத்திச் செல்லவும் தயார் என்று பறைசாற்றுகிறார்கள்' எனத் தெரிவித்துள்ளார்.