சிவகாசி: சிவன் ஆலயத்தில் அன்ன அபிஷேக விழா. பக்தர்கள் தரிசனம்.

சிவகாசி சிவன் கோவிலில் 'அன்ன அபிஷேக விழாவில் திரளான பக்தர்கள் சுவாமி தரிசனம்.
விருதுநகர் மாவட்டம், சிவகாசியில், இந்து சமய அறநிலையத்துறைக்கு சொந்தமான பிரசித்தி பெற்ற சிவன் கோவிலில் இன்று, ஐப்பசி மாத பௌர்ணமியை முன்னிட்டு சுவாமிக்கு சிறப்பு அன்ன அபிஷேகம் நடைபெற்றது. முன்னதாக, ஸ்ரீவிஸ்வநாதர் சுவாமிக்கும் - ஸ்ரீவிசாலாட்சி அம்மனுக்கும் சிறப்பு அபிஷேகங்கள் நடைபெற்றன. அதனை தொடர்ந்து கோவில் வளாகம் மற்றும் அனைத்து சன்னதிகளிலும் காய்கறிகளால் தோரணம் கட்டி அலங்காரம் செய்யப்பட்டது. இதனையடுத்து, மூலவர் ஸ்ரீவிஸ்வநாதர் சுவாமிக்கு அன்னாபிஷேகம் நடைபெற்றது. அன்ன அபிஷேக சிறப்பு அலங்காரத்தில் எழுந்தருளிய சுவாமிக்கு சிறப்பு அர்ச்சனைகள் மற்றும் பூஜைகள் நடைபெற்றன. சிறப்பு பூஜையில் திரளான பக்தர்கள் கலந்து கொண்டு சுவாமி தரிசனம் செய்து வருகின்றனர்.