தஞ்சாவூர் புதிய ஹவுசிங் யூனிட்டில் ஒளிராத தெருவிளக்குகள்

தஞ்சாவூர் புதிய ஹவுசிங் யூனிட்டில் பல நாட்களாக தெரு விளக்கு எரியாததால் பொதுமக்கள் அவதியுற்று வருகின்றனர்.

தஞ்சாவூர் மாநகராட்சி 51வது வார்டு புதியபேருந்து நிலையம் அருகே புதிய ஹவுசிங் யூனிட் உள்ளது. இங்கு உள்ள அடுக்குமாடி குடியிருப்பில் நூற்றுக்கணக்கான குடும்பங்கள் வசித்து வருகின்றனர். இப்பகுதியில் கடந்த பல நாட்களாக தெரு மின்விளக்குகள் ஒளிர்வதில்லை என இப்பகுதிவாசிகள் புகார் தெரிவித்துள்ளனர். மேலும் ஆங்காங்கே உள்ள புதர்களிலிருந்து பாம்புகள், விஷ ஜந்துக்கள் இரவு நேரங்களில் சாலைகளில் ஊர்ந்து வருவதால் வீட்டை விட்டு பொதுமக்கள் வெளியே வர அச்சம் அடைந்துள்ளனர்.

இது குறித்து பலமுறை மாநகராட்சி அதிகாரிகளிடம் புகார் செய்தும் நடவடிக்கை எடுக்கப்படவில்லை என இப்பகுதிவாசிகள் குற்றம் சாட்டுகின்றனர். குடியிருப்பில் பெரும்பாலான வீடுகளில் அரசு ஊழியர்கள், அதிகாரிகள் குடியிருந்து வரும் நிலையில் உடனடியாக தெருவிளக்கு ஒளிர்வதற்கு மாநகராட்சி அதிகாரிகள் நடவடிக்கை எடுக்க முன் வர வேண்டும் என்றனர்.