கடம்பவனேஸ்வரர் திருக்கோவில் மாசி மக தேர்த்திருவிழா

கரூர் மாவட்டம் குளித்தலை கடம்பவனேஸ்வரர் திருக்கோவிலானது காசிக்கு அடுத்து வடக்கு நோக்கி அமைந்துள்ள மிகவும் பிரசித்துப்பெற்ற திருத்தலமாகும். திருநாவுக்கரசர், அப்பர், மாணிக்கவாசகர், அருணகிரிநாதர் ஆகியோரால் தேவாரம் பாடப்பட்ட சிவஸ்தலமாகவும் விளங்கி வருகிறது.

அருள்மிகு முற்றிலா முலையம்மை உடனுறை கடம்பவனநாதர் திருக்கோயில் மாசிமக பிரம்மோற்சவம் 13 நாள் நடைபெறுகிறது. இந்நிகழ்ச்சியொட்டி கடந்த மார்ச் 02 -ஆம்தேதி கொடியேற்றத்துடன் துவங்கியது.


அதனையடுத்து ஒவ்வொரு நாளும் சுவாமி அலங்காரத்துடன் வீதி உலா நடைபெற்று வந்தது. திருவிழாவின் முக்கிய நிகழ்ச்சியான திருத்தேர் வடம்பிடித்தல் இன்று காலை நடந்தது.


சோமஸ்கந்தர் பெரியநாயகர் அம்பாளுடன் சிறப்பு அலங்காரத்தில் எழுந்தருளிய திருத்தேரினை பக்தர்கள், பொதுமக்கள் ஓம் நமச்சிவாயா ஹர ஹர மஹாதேவா என நாமங்கள் முழங்க தேரினை வடம் பிடித்து இழுத்தனர்.


வழி நெடுங்கிலும் பக்தர்கள் தேங்காய் உடைத்து அர்ச்சனை செய்து வழிபட்டனர். கோவிலை சுற்றியுள்ள நான்கு வீதிகள் வழியாக வலம் வந்த தேர் நிலையை வந்தடைந்தது. சிவாச்சாரியார்கள் உடுக்கை பம்பை மேளதாளங்கள் வாசித்தவாறு வந்தனர்.

இதில் குளித்தலை பகுதியை சுற்றியுள்ள ஏராளமான பொதுமக்கள் கலந்து கொண்டு சுவாமி தரிசனம் செய்து வழிபட்டனர்.