கருங்கல்: பைக்கில் கார் மோதி இளம் பெண் உயிரிழப்பு

கருங்கல் அருகே மிடாலக்காடு பகுதியை சேர்ந்தவர் ஸ்டீபன் ஜான்சிங் (42). இவர் வெளிநாட்டில் வேலை பார்த்து வருகிறார். இவரது மனைவி மேரி சுஜா (36). இவரது மகன்  கருங்கலில் உள்ள ஒரு பள்ளியில் ஐந்தாம் வகுப்பு படித்து வருகிறார். சுஜா நேற்று மாலை மகனை பள்ளியில் இருந்து அழைத்து வருவதற்காக கருங்கல் நோக்கி இரு சக்கர வாகனத்தில் சென்று கொண்டிருந்தார்.

      காக்கவிளை என்ற பகுதியில் வரும்போது, எதிரே தாறுமாறாக வந்த சொகுசு கார் ஒன்று மேரி சுஜாவின் இருசக்கர வாகனத்தில் மோதியது. இதில் மேரி சுஜா தூக்கி வீசப்பட்டு, சொகுசு கார் எதிரே இருந்த மின்கம்பத்தில் மோதி அருகில் இருந்த காம்பவுண்டு சுவரை இடித்து நின்றது.

       இதில் மேரி சுஜா சம்பவ இடத்திலேயே உயிரிழந்தார். இது குறித்து கருங்கல் போலீசார் சம்பவ இடத்திற்கு சென்று மேரி சுஜா உடலை குமரி அரசு மருத்துவக் கல்லூரி மருத்துவமனைக்கு அனுப்பி வைத்தனர். காரை ஓட்டி வந்த மிடாலக்காடு பகுதியை சேர்ந்த சந்திரன் மகன் அஜித் லிபின் ( 28) என்பவர் மது போதையில் இருந்தது தெரிய வந்தது. அவர் மீது வழக்கு பதிவு செய்து போலீசார் விசாரணை நடத்தி வருகின்றனர்.