மெட்ரோ ரயில் திட்டம்: இரட்டை அடுக்கு மேம்பால பணிகள் தீவிரம்
இரண்டாம் கட்ட சென்னை மெட்ரோ ரயில் திட்டத்தில், 5வது மற்றும் 4வது வழித்தட மெட்ரோ ரயில் பாதைகளை 3. 75 கி. மீ. தொலைவுக்கு இணைக்கும் இரட்டை அடுக்கு மேம்பால பணிகள் முழுவீச்சில் நடைபெற்று வருகின்றன. சென்னையில் இரண்டாம் கட்ட மெட்ரோ ரயில் திட்டம், மொத்தம் 3 வழித்தடங்களில் 116. 1 கி. மீ. தொலைவுக்கு செயல்படுத்தப்படுகிறது. உயர்மட்டப்பாதை, சுரங்கப் பாதை மற்றும் மெட்ரோ ரயில் நிலையங்கள் அமைக்கும் பணிகள் 45க்கும் மேற்பட்ட இடங்களில் விறுவிறுப்பாக நடைபெற்று வருகின்றன. மாதவரம்-சோழிங்கநல்லூர் (5வது வழித்தடம்), கலங்கரை விளக்கம்-பூந்தமல்லி (4வது வழித்தடம்) இடையேயான மெட்ரோ ரயில் பாதை சில இடங்களில் இணைகின்றன. குறிப்பாக, போரூர் சந்திப்பு, ஆலப்பாக்கம், காரம்பாக்கம், வளசரவாக்கம், ஆழ்வார் திருநகர் ஆகிய மெட்ரோ ரயில் நிலையங்கள் பகுதிகளில் இரட்டை அடுக்கு மேம்பால பாதைகள் அமையவுள்ளன. இதற்காக, பிரத்யேக லாஞ்சிங் கிர்டர் வகையை சேர்ந்த ராட்சத இயந்திரங்கள் மற்றும் கிரேன்கள் பயன்படுத்தப்படுகின்றன. இந்த பாதையில் சி-4, சி-5 என்று பிரித்து பணிகள் நடைபெற்று வருகின்றன. மொத்தம் 340 தூண்களில் இதுவரை 156 தூண்கள் அமைக்கப்பட்டுள்ளன. மேலும், பாலத்தை தாங்கும் தூண்கள் அதாவது தூண்களில் தொப்பி வடிவிலான கட்டுமானம் அமைக்கப்பட்டு வருகின்றன. இதுதவிர, தூண்கள் மீது இரும்பு பாலத்தை எடுத்து வைக்கும் பணியும் நடைபெறுகிறது.
