சிவகாசி: பற்றி எரிந்த ஆம்னி பேருந்து. ஒருவர் பலி..

சிவகாசியிலிருந்து கோவை நோக்கி சென்ற ஆம்னி பேருந்தில் தீ விபத்து. பெரும் உயிர்ச்சேதம் தவிர்ப்பு.
விருதுநகர் மாவட்டம்,
சிவகாசியிலிருந்து கோயம்புத்தூர் செல்லும் தனியார் ஆம்னி பேருந்து நேற்று இரவு 6 பயணிகளை ஏற்றுக் கொண்டு புறப்பட்டது. பேருந்தை மாரியப்பன் என்பவர் ஓட்டிச் சென்றார். நேற்று இரவு10 மணி அளவில் சிவகாசி - சாத்தூர் சாலையில் அனுப்பன்குளம் அருகே சென்ற போது எதிரே வந்த பைக் மீது ஆம்னி பேருந்து மோதிய விபத்தில் மீனம்பட்டியை சேர்ந்த கார்த்திக்(35) என்பவர் சம்பவ இடத்திலேயே உயிரிழந்தார்.
ஆம்னி பேருந்து மோதி சில மீட்டர் தூரம் இழுத்துச் செல்லப்பட்டதில் பைக்கின் பெட்ரோல் டேங்க் வெடித்து பற்றிய தீ, பேருந்திலும் பரவியது. உடனடியாக பேருந்தில் இருந்த பயணிகள் மற்றும் ஓட்டுநர் பேருந்தை விட்டு இறங்கி ஓடினர். சில வினாடிகளில் ஆம்னி பேருந்து முழுவதும் தீப்பற்றி எரிய தொடங்கியது. சம்பவ இடத்திற்கு வந்த சிவகாசி தீயணைப்புத் துறையினர் ஒரு மணி நேரம் போராடி தீயை அணைத்தனர். இந்த விபத்தில் ஆம்னி பேருந்து முழுவதும் எரிந்து தீக்கிரையானது. விபத்து காரணமாக ஒரு மணி நேரத்திற்கு மேல் போக்குவரத்து பாதிக்கப்பட்டது. சம்பவ இடத்தில் மாவட்ட காவல் துணை கண்காணிப்பாளர் பாஸ்கரன் நேரில் ஆய்வு செய்து மீட்பு பணிகளை துரிதப்படுத்தினார். விபத்து குறித்து சிவகாசி கிழக்கு போலீஸார் வழக்கு பதிவு செய்து விசாரணை நடத்தி வருகின்றனர்.