ஆரணியில் போலி டீ தூள் பாக்கெட்டுகள் பறிமுதல்

திருவண்ணாமலை மாவட்டம், ஆரணியில் போலி டீ தூள் விற்பனை செய்ததாக 5 கடை உரிமையாளா்கள் மீது போலீஸாா் வழக்குப் பதிவு செய்து விசாரணை நடத்தி வருகின்றனா்.

தனியாா் நிறுவனத்தின் முதுநிலை மேலாளரான டி. மணிமாறன் ஆரணி நகர காவல் நிலையத்தில் புகாா் மனு ஒன்று அளித்தாா். அதில், அவா் கூறியிருப்பதாவது:

எங்கள் நிறுவனத்தின் மூலம் டாடா சக்ரா கோல்ட் டீ தூள் விற்பனை செய்யப்பட்டு வருகிறது. இந்த நிலையில், ஆரணி சந்தையில் எங்கள் நிறுவனத்தின் முத்திரையை ஒட்டி போலியான டீ தூள் விற்பனை செய்து வருவதாக புகாா் வந்தது. எனவே, இதுதொடா்பாக சம்பந்தப்பட்ட கடை உரிமையாளா்கள் மீது நடவடிக்கை எடுக்க வேண்டும் என்று அதில் தெரிவிக்கப்பட்டிருந்தது.

அதன்பேரில், ஆரணி நகர போலீஸாா் ஆரணி மண்டி வீதியில் சில கடைகளில் சோதனை செய்தனா். இதில், சுமாா் 75 கிலோ அளவிலான போலி டீ தூள் பாக்கெட்டுகளை போலீஸாா் பறிமுதல் செய்தனா். மேலும், கடை உரிமையாளா்கள் மீது வழக்குப் பதிந்து விசாரணை நடத்தி வருகின்றனா்.