குன்னூர்: 5-வது அக்னிவீரர் படையின் வெளியேறும் அணிவகுப்பு
நீலகிரி மாவட்டம் குன்னூர் அருகே உள்ள வெல்லிங்டன் மெட்ராஸ் ரெஜிமென்டல் மையத்தில் நடைபெற்ற 5-வது அக்னிவீரர் படையின் வெளியேறும் அணிவகுப்பு இன்று காலை நடைபெற்றது. நீலகிரி மாவட்டம் குன்னூர் அருகே உள்ள வெல்லிங்டன் ராணுவ முகாமில் தமிழ்நாடு, கேரளா, ஆந்திரா, கர்நாடகா, தெலுங்கானா ஆகிய மாநிலங்களைச் சேர்ந்த (551) வீரர்களுக்கு அக்னிவீர் பயிற்சி அளிக்கப்பட்டு எல்லைப் பகுதிகளுக்குப் பாதுகாப்புப் பணிக்காக அனுப்பப்பட உள்ளனர். இந்நிலையில் 551 அக்னிவீரர்களின் கடுமையான பயிற்சி கடந்த (31) வாரங்களில் நடைபெற்று இன்று நிறைவடைந்தது. அக்னிவீரர்கள் நாட்டின் எல்லைப் பகுதிகளுக்கு அனுப்பும் நிகழ்ச்சி இன்று நடந்தது. இதில் மேஜர் ஜெனரல் மேத்யூ, பயிற்சி எம்.ஏர்.சி. கமாண்டர் கிருஷ் நேந்து தாஸ் உள்ளிட்ட ராணுவ உயர் அதிகாரிகள் கலந்துகொண்டு வீரர்களின் அணிவகுப்பு மரியாதையை ஏற்றுக்கொண்டனர். இதனைத் தொடர்ந்து அனைத்து வீரர்களும் தேசியக் கொடி, பகவத் கீதை, குரான், பைபிள் ஆகியவற்றின் மீது கை வைத்து ஒவ்வொரு வீரரும் உறுதிமொழி எடுத்துக்கொண்டனர். இந்த வீரர்களுக்கு நாட்டின் எல்லையில் நான்கு ஆண்டுகாலம் மட்டுமே பணிசெய்ய அனுமதிக்கப்பட்டுள்ளது. நிகழ்ச்சியில் ராணுவ வீரர்களின் குடும்பத்தினர் மற்றும் சுற்றுவட்டாரப் பகுதியைச் சேர்ந்த பொதுமக்கள் கலந்துகொண்டனர்.
