அவல்பூந்துறை அருகே கல்யாண் ஸ்டோரில் நள்ளிரவில் ஏற்பட்ட தீ

ஈரோடு மாவட்டம் அவல்பூந்துறை அருகே உள்ள காளிபாளையம் பகுதியில் சேர்ந்தவர் மணி (50). இவர் அவல்பூந்துறை அருகே உள்ள சோளிபாளையத்தில் கல்யாணம் ஸ்டோர் கடை வைத்து நடத்தி வருகிறார். தீபாவளி பண்டிகையையொட்டி நேற்று கடைக்கு யாரும் வரவில்லை. இந்நிலையில் நேற்று நள்ளிரவு 1 மணியளவில் கடை தீ பிடித்து எரிந்துள்ளது. இதனால் கல்யாண் ஸ்டோர் அருகில் உள்ள வீடுகளில் வசிப்பவர்கள் வெளியே வந்து பார்த்தபோது கல்யாண் ஸ்டோர் தீப்பிடித்து எரிந்து கொண்டிருந்தது. இதுகுறித்து உடனடியாக மொடக்குறிச்சி தீயணைப்புத்துறை மற்றும் அரச்சலூர் போலீசாருக்கும் தகவல் கொடுத்தனர். இதனையடுத்து உடனடியாக சம்பவ இடத்திற்கு வந்த மொடக்குறிச்சி தீயணைப்பு துறையினர் தீயை அணைக்கும் பணியில் ஈடுபட்டனர். ஆனால் கடையில் இருந்த 4 சிலிண்டர்கள் வெடித்தால் மேலும் தீ அதிகரித்தது. அதனைத் தொடர்ந்து தீயை கட்டுக்குள் கொண்டுவர முடியவில்லை. இதனையடுத்து ஈரோட்டில் இருந்து ஒரு தீயணைப்பு வாகனம் வரவழைக்கப்பட்டு தீயை அணைக்கும் பணியில் ஈடுபட்டனர்.
அதேபோல் தீ மற்ற இடங்களில் பரவாமல் இருப்பதற்காக தீ தடுப்பு பணியில் ஈடுபட்டனர். நீண்ட நேரத்திற்கு பிறகு தீயை கட்டுக்குள் கொண்டு வந்தனர். இந்த தீ விபத்தில் கல்யாண் ஸ்டோரில் வைக்கப்பட்டிருந்த மைக் செட், பந்தல், சாமியான பந்தல், சமையல் பாத்திரங்கள், டேபிள், சேர், இரண்டு டெம்போ, சிலிண்டர் ஆகியவைகள் தீயில் இருந்து சாம்பலானது.