ஓடும் பஸ்சில் இருந்து தவறி விழுந்த 2 மாணவிகள் காயம்

கள்ளிமந்தையத்தில் இருந்து பழனிக்கு அரசு பஸ் ஒன்று காலையில் புறப்பட்டது. பஸ்சில் பள்ளி மாணவிகள் உள்பட பலர் பயணம் செய்தனர். பழனியை அடுத்த புளி யம்பட்டி பஸ்நிறுத்தத்தில் அந்த பஸ் நின்றது. அந்த பகுதியை சேர்ந்த பள்ளி மாணவிகள் சிலர் ஏறினர். புளியம்பட்டி கால்நடை மருத்துவமனை அருகே சாலை வளைவில் திரும் பியபோது, பஸ்சில் உள்ளே இருந்த 2 மாணவிகள் முன்பக்க படிக்கட்டு வழியாக திடீரென்று தவறி கீழே விழுந்தனர். இதை பார்த்த பயணிகள் அதிர்ச்சி அடைந்தனர். உடனே பஸ்சை நிறுத்தும்படி பயணிகள் கூச்சலிட்டனர். சிறிதுதூரம் சென்று அரசு பஸ் நின்றது. பஸ்சில் இருந்து பயணிகள் கீழே இறங்கி பதறியடித்து கொண்டு ஓடி வந்து காயம் அடைந்த மாணவிகளை மீட்டனர்.
அவர்கள், புளியம்பட்டியை சேர்ந்த காளிமுத்து மகள் சாதனாஸ்ரீ (வயது 13), சின்னத்துரை மகள் லோகப்பிரியா (15) என்பது தெரியவந்தது. உடனே அவர்களை சிகிச்சைக்காக பழனி அரசு மருத்துவமனையில் சேர்த்தனர். இதுகுறித்து பழனி போலீசார் விசாரணை நடத்தி வருகின்றனர்.