அமீபிக் மெனிங்கோஎன்செபாலிடிஸ்: 2 உயிர்கள் பலி

அமீபிக் மெனிங்கோஎன்செபாலிட்டிஸ் என்ற அரிதான நோயானது தற்போது கேரளாவில் கவலையை ஏற்படுத்தியுள்ளது. இரண்டு மாதங்களுக்குள், மூன்று குழந்தைகளுக்கு நோய் இருப்பது கண்டறியப்பட்டுள்ளது, அவர்களில் இருவர் உயிரிழந்துள்ளனர். ஏழு ஆண்டுகளாக ஆறு பேரை மட்டுமே பாதித்த இந்நோய், தற்போது மாநிலத்தில் தீவிர பிரச்னையாக மாறியுள்ளது. கோழிக்கோடு ஃபெரோக்கைச் சேர்ந்த 12 வயது சிறுவன் ஒரு தனியார் மருத்துவமனையில் வென்டிலேட்டரில் உயிருக்குப் போராடிக் கொண்டிருக்கிறார். முன்னதாக, மலப்புரத்தைச் சேர்ந்த 5 வயது சிறுமி மே 21 அன்று இறந்தார், அதைத் தொடர்ந்து ஜூன் 16 அன்று கண்ணூரில் 13 வயது சிறுமி இறந்தார்.

5 வயது சிறுமி மலப்புரத்தில் உள்ள கடலுண்டி ஆற்றிலும், மற்ற இரண்டு குழந்தைகளும் வெவ்வேறு ஆறுகளிலும் குளித்த பிறகு இந்த நோய்த்தொற்று ஏற்பட்டதாக கூறப்படுகிறது. அமீபா மூக்கு வழியாக உடலுக்குள் புகுந்து, உயிரிழப்பை ஏற்படுத்தியுள்ளது. அமீபிக் மெனிங்கோஎன்செபாலிடிஸின் உயிர்வாழ்வு விகிதம் மூன்று சதவீதம் மட்டுமே என தெரிவிக்கப்பட்டுள்ளது.