భక్తిశ్రద్ధలతో నారాయణ స్వామికి పూజలు

ప్రకాశం జిల్లా కనిగిరిలో ప్రసిద్ధిగాంచిన ప్రముఖ పుణ్యక్షేత్రమైన శ్రీ మిట్టపాలెం నారాయణస్వామి ఆలయంలో ఆదివారం పూజా కార్యక్రమాలు అత్యంత వైభవంగా జరిగాయి. వివిధ ప్రాంతాల నుంచి వచ్చిన భక్తులు స్వామివారిని దర్శించుకొని ప్రత్యేక పూజలు నిర్వహించారు. ఆలయంలో మహా నివేదన పంచరథ కుంభ గోపూజ కార్యక్రమాలు ఆలయ ప్రధాన అర్చకులు సత్యనారాయణ శర్మ ఆధ్వర్యంలో జరిగాయి. మహిళలు పొంగళ్ళు పెట్టుకొని మొక్కులు తీర్చుకున్నారు. ఆలయంలో భక్తులకు ఉచిత అన్నదానం నిర్వహించారు. ఈ కార్యక్రమాలను ఆలయ కార్యనిర్వహణాధికారి నర్రా నారాయణరెడ్డి, ఆలయ ట్రస్ట్ బోర్డ్ చైర్మన్ దుగ్గిరెడ్డి జైరెడ్డి, ఆలయ ట్రస్ట్ బోర్డ్ సభ్యులు పర్యవేక్షించారు.