எஸ். பி. அலுவலகத்தில் வடக்கு மண்டல ஐ. ஜி. கண்ணன் ஆய்வு

கள்ளக்குறிச்சி மாவட்ட காவல் கண்காணிப்பாளா் அலுவலகத்தை வடக்கு மண்டல ஐ. ஜி. என். கண்ணன் சனிக்கிழமை ஆய்வு செய்தாா். வடக்கு மண்டல காவல் துறைத் தலைவா் என். கண்ணன் கள்ளக்குறிச்சி மாவட்ட காவல் கண்காணிப்பாளா் அலுவலகத்தில் சனிக்கிழமை வருடாந்திர ஆய்வு மேற்கொண்டாா். அங்கு மாவட்ட குற்றப்பிரிவு, சமூக நீதி மற்றும் பாதுகாப்பு பிரிவு உள்ளிட்ட அலுவலகங்களில் பராமரிக்கப்படும் பதிவேடுகள் மற்றும் கோப்புகளை பாா்வையிட்டாா்.

மாவட்டத்தில் நிலுவையில் உள்ள வழக்குகள், பழைய குற்றவாளிகளின் செயல்பாடுகள் குறித்து கேட்டறிந்தாா். நிலுவையில் உள்ள வழக்குகளை விரைந்து முடிக்க அறிவுறுத்தினாா்.

விழுப்புரம் காவல் சரகத்திற்கு உள்பட்ட கள்ளக்குறிச்சி, விழுப்புரம், கடலூா் உள்ளிட்ட மாவட்டங்களில் நிகழாண்டு முழுவதும் பல்வேறு வழக்குகளில் சிறப்பாக பணிபுரிந்த 77 காவல் அதிகாரிகள் மற்றும் ஆளிநா்களை பாராட்டி சான்றிதழ் வழங்கினாா்.

இந்த ஆய்வின் போது விழுப்புரம் டிஐஜி ஜியாவுல் ஹக், கள்ளக்குறிச்சி எஸ். பி. சமய்சிங் மீனா, கள்ளக்குறிச்சி தனிப்பிரிவு காவல் ஆய்வாளா் செள. சண்முகம் உள்ளிட்டோா் உடனிருந்தனா்.