விழுப்புரத்தில் டிராபிக்.. திருச்சி நோக்கி அணிவகுத்த வாகனங்கள்

தமிழகத்தில் பள்ளி மாணவர்களுக்கான அரையாண்டு தேர்வு விடுமுறை மற்றும் கிறிஸ்துமஸ் விடுமுறை என 10 நாள்கள் தொடர் விடுமுறை வழங்கப்பட்டுள்ளதால், சென்னையிலிருந்து, ஏராளமானோர் சொந்த ஊர்களுக்கு செல்கின்றனர். இதனால், கடந்த சில தினங்களாக சென்னை-திருச்சி தேசிய நெடுஞ்சாலையில் அதிகளவில் வாகனங்கள் செல்கின்றன. 

இதேபோல், நேற்று காலை முதல் மதியம் வரை, திருச்சி மார்க்கத்தில் இருமடங்கு வாகனங்கள் அதிகரித்திருந்தன. விழுப்புரம் பைபாஸ் சாலையில், ஜானகிபுரம் பைபாஸ் சந்திப்பு பாலத்தில் ஏராளமான கார்கள், பஸ்கள் உள்ளிட்ட வாகனங்கள் குவிந்ததால், போக்குவரத்து நெரிசல் ஏற்பட்டது. இரண்டு, மூன்று வரிசையாக வாகனங்கள் அணிவகுத்து ஊர்ந்து சென்றன. 

காலை 10 மணி முதல் மாலை 3.00 மணி வரை நெரிசல் நிலை தொடர்ந்தது. ஜானகிபுரம் முதல் எல்லீஸ் சத்திரம் சாலை சந்திப்பு வரை இந்த நெரிசல் நிலை ஏற்பட்டது. ஜானகிபுரம் மற்றும் விழுப்புரம் எல்லீஸ் சத்திரம் சந்திப்பில் பாலம் கட்டுமான பணிகள் நடப்பதால், மேலும் போக்குவரத்து நெரிசல் ஏற்பட்டது. போக்குவரத்து போலீசார், வாகனங்களை சீர்படுத்தி அனுப்பும் பணியில் ஈடுபட்டனர்.