குடிபோதையில் கத்தியுடன் வீதியில் தகராறு - வைரலான வீடியோ!

வேலூர் சின்னஅல்லாபுரம் பனந்தோப்பு பகுதி மூன்றாவது தெருவை சேர்ந்தவர் ரூஷானா(25). இவர் அவரது சகோதரருடன் வீட்டு அருகே நின்று கொண்டிருந்துள்ளனர். அப்போது பனந்தோப்பு பகுதி ஐந்தாவது தெருவை சேர்ந்த ஜாபீர் மற்றும் இம்தியாஸ் ஆகியோர் மதுபோதையில் இருசக்கர வாகனத்தில் வந்து ரூஷானா வீட்டின் முன்பு டூ வீலரை நிறுத்திவிட்டு ஒருவரை ஒருவர் தகாத வார்த்தைகளால் திட்டி தாக்கிக் கொண்டுள்ளனர்.

அந்த சமயம் ஜாபீர் அங்கிருந்து இறைச்சி கடையில் இருந்து கத்தியை எடுத்து அங்கு நின்ற ரூஷானா கழுத்தில் வைத்து மிரட்டியுள்ளார். அதில் அவருக்கு லேசான காயம் ஏற்பட்டு வேலூர் அரசு மருத்துவக் கல்லூரி மருத்துவமனையில் சிகிச்சை எடுத்து வருகிறார்.

இந்நிலையில், கத்தியை எடுத்துக்கொண்டு சாலையில் ஓடுவது போன்றும், மக்கள் அலறுவது போன்றும் வீடியோ சமூக வலைதளத்தில் பரவியது. பின்னர் சம்பவ இடத்திற்கு விரைந்த பாகாயம் காவல் நிலைய போலீசார் குடிபோதையில் தகராறில் ஈடுபட்ட ஜாபீர் மற்றும் இம்தியாஸ் ஆகியவரை கைது செய்தனர்.