விஜய்யின் கட்சிக்கொடி குறித்த கேள்விக்கு துரைமுருகன் சொன்ன பதில்!

வேலூரில் அமைச்சர் துரைமுருகன் செய்தியாளர்களுக்கு பேட்டியளித்தார். அப்போது அவர் கூறியதாவது,

வேலூர் மாவட்டத்திற்கு சுற்றுலா தளம் இல்லாத சூழலில் குடியாத்தம் அடுத்த மோர்தானாவில் உள்ள மிகப்பெரிய தடுப்பணை சுற்றுலாத்தலமாக மாற்றப்படுமா என்ற கேள்விக்கு, அங்கு ஏற்கனவே பூங்கா உள்ளிட்ட வசதிகளை செய்து கொடுத்துள்ளோம். மேலும் ஒரு சில நாட்களில் சுற்றுலாத்தளமாக மாற்ற நடவடிக்கை எடுக்க ஆலோசிக்கப்படும் என கூறினார்.

டெல்லியில் நடைபெறும் காவிரி ஒழுங்காற்று குழு கூட்டம் குறித்து கேட்டதற்கு, ஒவ்வொரு முறையும் காவேரி நீரை போராடிதான் பெற்று வருகிறோம். இந்த ஆட்சி அல்ல எந்த ஆட்சியில் எந்த அமைச்சராக இருந்தாலும் இதே நிலைதான் நீடித்து வருகிறது. ஒவ்வொரு முறையும் நீதிமன்றத்தை நாடி நமக்கான உரிமையை பெற்று வருகிறோம் என்றார்.

நடிகர் விஜய்யின் கட்சிக்கொடி குறித்து கேட்டதற்கு, அது பறக்கும்போது நான் பார்பேன் என்றார். அமைச்சரவை மாற்றம் மற்றும் துணை முதல்வர் பதவிகுறித்து கேட்டதற்கு, அமைச்சரவையில் மாற்றம் இல்லை என முதல்வர் தெளிவாக கூறியிருக்கிறார். எதிர்பார்ப்பது எல்லாத்தையும் கொடுக்க முடியுமா? என்றால் முடியாது. எதிர்பார்க்காததையும் கொடுக்க முடியும். மேலும் முதலமைச்சர் தன்னுடைய ஆளுகைக்கு உட்பட்டு, நிர்வாகத்தில் தேவையான நேரத்தில் எதை செய்ய வேண்டுமோ அதை செய்வார் அதில் போய் நாம் தலையிடக் கூடாது", எனக் கூறினார்.