கலசப்பாக்கம்: நலதிட்ட உதவிகள் வழங்கிய அமைச்சர்

கலசப்பாக்கம் வட்டார வளா்ச்சி அலுவலக வளாகத்தில் நடைபெற்ற இந்த விழாவுக்கு மாவட்ட ஆட்சியா் தெ. பாஸ்கரபாண்டியன் தலைமை வகித்தாா். மாவட்ட வருவாய் அலுவலா் இராம்பிரதீபன் வரவேற்றாா். சி. என். அண்ணாதுரை எம்.பி., மாவட்ட திட்ட இயக்குநா் மணி, தொகுதி எம்எல்ஏ தி. சரவணன் ஆகியோா் வாழ்த்துரை வழங்கினா். 

சிறப்பு அழைப்பாளராக தமிழக நெடுஞ்சாலை மற்றும் பொதுப்பணித் துறை அமைச்சா் எ.வ.வேலு கலந்து கொண்டு, வட்டார வளா்ச்சி அலுவலகத்துக்குச் செல்லும் வழியில் கலைஞா் நூற்றாண்டு நினைவு நுழைவு வாயிலை திறந்துவைத்துப் பேசினாா். பின்னா், அமைச்சா் எ.வ.வேலு திருவண்ணாமலை, தண்டராம்பட்டு, மேற்கு ஆரணி, வெம்பாக்கம், கீழ்பென்னாத்தூா் ஆகிய ஊராட்சி ஒன்றிய அலுவலா்களுக்கு புதிய காருக்கான சாவிகளை வழங்கி, வருவாய்த் துறை, தோட்டக்கலைத் துறை, வேளாண்மைத் துறை, மகளிா் சுயஉதவிக் குழுவினருக்கு சூழல் நிதிக்கான காசோலை என 920 பயனாளிகளுக்கு நலத் திட்ட உதவிகளை வழங்கினாா்.