திருச்சி வந்த விமானத்தில் நடுவானில் தஞ்சை பயணி உயிரிழப்பு
திருச்சி விமான நிலையத்துக்கு சிங்கப்பூரிலிருந்து ஒரு விமானம் நேற்று(நவம்பர் 10) காலை புறப்பட்டது. விமானம் புறப்பட்ட சிறிது நேரத்தில் அதில் பயணித்த தஞ்சாவூர் மாவட்டம் ஒரத்தநாட்டைச் சேர்ந்த 32 வயது பயணி ஒருவருக்கு திடீரென உடல் நலக்குறைவு ஏற்பட்டது. இது குறித்து விமான பணியாளர்களிடம் அவர் தெரிவித்தார். உடனே அவருக்கு முதலுதவி சிகிச்சை அளித்தனர். விமானம் இலங்கை வான் பகுதியில் பறந்து கொண்டிருந்தபோது பயணியின் உடல்நிலை மேலும் மோசமடைந்தது. இதனால் அவருக்கு சிகிச்சை அளிக்க விமானத்தை அவசரமாக இலங்கை தலைநகர் கொழும்பு விமான நிலையத்தில் தரையிறக்கினர். அங்கு தயாராக இருந்த மருத்துவ குழுவினர் அவருக்கு சிகிச்சை அளித்தும் சிகிச்சை பலனின்றி அவர் உயிரிழந்தார். இதனால் சிங்கப்பூர் விமானம் சில மணி நேரம் தாமதமாக திருச்சி விமான நிலையத்திற்கு மதியம் 3.30 க்கு வந்து சேர்ந்தது. இறந்தவர் உடல் கொழும்பு நகரில் பாதுகாப்புடன் வைக்கப்பட்டுள்ளதாக கூறப்படுகிறது.
