நீடாமங்கலம் பேரூராட்சி அலுவலகத்தில் 21 ஆண்டு காலமாக தற்காலிக கணினி ஆப்ரேட்டராக பணியாற்றி வந்தவர் சாந்தி. கணவரை இழந்த இவர் 10 வயது நிரம்பிய பெண் குழந்தையுடன் நீடாமங்கலம் பகுதியில் வசித்து வருகிறார். நீடாமங்கலம் பேரூராட்சி தலைவராக ராமராஜ் உள்ளார். நீடாமங்கலம் பேரூராட்சி துணைத் தலைவராக மார்க்சிஸ்ட் கம்யூனிஸ்ட் கட்சியைச் சேர்ந்த நிர்வாகி ராபர்ட் பிரைஸ் என்பவரது மனைவி ஆனந்தமேரி உள்ளார். ஆனந்தமேரி பெயளரவிற்கு மட்டுமே துணைத் தலைவராக இருந்துவரும் நிலையில், நீடாமங்கலம் பேரூராட்சி நிர்வாகத்தின் அனைத்து அலுவல்களிலும் ராபர்ட் பிரைஸ் தலையீடு உள்ளதாக கூறப்படுகிறது. இதற்கிடையே பேரூராட்சியில் பணியாற்றி வந்த சாந்தியை, கடந்த ஆண்டு மார்ச் மாதம் நீடாமங்கலம் பேரூராட்சி துணைத் தலைவரின் கணவர் ராபர்ட் பிரைஸ் (சிபிஎம்) நாங்கள் சொல்வதை கேட்க மாட்டியா என ஒருமையில் தகாத வார்த்தைகளால் பேசியுள்ளார். இதுகுறித்து சாந்தி காவல்துறையிடம் புகார் அளித்ததால், அவரை பழிவாங்கும் நடவடிக்கையாக நீடாமங்கலம் பேரூராட்சி தலைவர் ராமராஜ் கடந்த மார்ச் மாதம் சாந்தியை நிரந்தர பணி நீக்கம் செய்து உத்தரவிட்டார். இதனால் மனமுடைந்த சாந்தி தனது குழந்தையுடன் தற்கொலை செய்துகொள்வதை தவிர வேறு வழியில்லை என மாவட்ட ஆட்சியர் அலுவலகத்திற்கு நேற்று மண்ணெண்னை பாட்டிலுடன் வந்தார். இதனால் மாவட்ட ஆட்சியர் அலுவலக வளாகத்தில் பரபரப்பு நிலவியது.