போடி ரயில் நிலையத்தில் தென்னக ரயில்வே மேலாளர் ஆய்வு

போடி ரயில் நிலையத்தில் சென்னை தென்னக ரயில்வே துணைப் பொது மேலாளர் கவுசல் கிஷோர், மதுரை கோட்ட கூடுதல் ரயில்வே மேலாளர் எல். நாகேஸ்வரரావ் ஆகியோர் திங்கள்கிழமை திடீர் ஆய்வு மேற்கொண்டனர். 

மதுரை- போடிநாயக்கனூர் இடையே அகல ரயில் பாதை அமைக்கப்பட்டு தினசரி காலை, மாலை வேளைகளில் ரயில் சேவை நடைபெற்று வருகிறது. இதேபோல, போடிநாயக்கனூரிலிருந்து சென்னைக்கு வாரத்தில் மூன்று நாள்கள் விரைவு ரயில் இயக்கப்பட்டு வருகிறது. 

அண்மையில் போடிநாயக்கனூர்-மதுரை இடையேயான 90.4 கி.மீ. தொலைவு மின்மயமாக்கப்பட்டு மின்சார என்ஜின் மூலம் ரயில்கள் இயக்கப்பட்டு வருகின்றன. போடிநாயக்கனூர்- மதுரை, போடிநாயக்கனூர்- சென்னை ரயில்களில் கூடுதல் பயணிகள் பயணம் செய்து வருவதால் ரயில்வேக்கு கூடுதல் வருவாய் கிடைக்கிறது. 

இதனால் கூடுதலாக மதுரை- போடிநாயக்கனூர், போடிநாயக்கனூர்- மதுரை, போடிநாயக்கனூரிலிருந்து சென்னை, ராமேஸ்வரம் உள்ளிட்ட ஊர்களுக்கு கூடுதலாக ரயில்கள் இயக்க வேண்டும் என ரயில் பயணிகள், ரயில்வே ஆர்வலர்கள் வலியுறுத்தி வருகின்றனர்.