வெற்றி சான்றிதழை பெற்றார் திமுக தலைவர் ஸ்டாலின்

சென்னை லயோலா கல்லூரிக்கு சென்ற மு.க.ஸ்டாலின் கொளத்தூர் தொகுதியில் வெற்றிபெற்றதற்கான சான்றிதழை பெற்றுக்கொண்டார்.

சென்னை கொளத்தூர் தொகுதியில் திமுக சார்பில் அக்கட்சியின் தலைவர் மு.க.ஸ்டாலின் மீண்டும் களமிறங்கினார். அதிமுக சார்பில் ஆதிராஜாராம், அமமுக சார்பில் ஜெ.ஆறுமுகம், மக்கள் நீதி மய்யம் சார்பில் ஜெகதீஷ்குமார், நாம் தமிழர் கட்சி சார்பில் கெமில்ஸ் செல்வா ஆகியோர் போட்டியிட்டனர்.

வாக்கு எண்ணிக்கை தொடங்கியதில் இருந்தே மு.க.ஸ்டாலின் முன்னிலை வகித்து வந்தார். இறுதியாக திமுக தலைவர் முக ஸ்டாலின் 1,04,462 வாக்குகள் பெற்றார். அதிமுக சார்பில் போட்டியிட்ட ஆதி ராஜாராம் 34,462 வாக்குகள் பெற்றார். இதன்மூலம் 70 ஆயிரம் வாக்குகள் வித்தியாசத்தில் முக ஸ்டாலின் வெற்றி பெற்றார்.

நுங்கம்பாக்கத்தில் தேர்தல் அலுவலரிடம் சட்டமன்ற உறுப்பினருக்கான சான்றிதழை மு.க.ஸ்டாலின் பெற்றுக்கொண்டார். இதையடுத்து அவர் மெரினாவில் உள்ள கருணாநிதி நினைவிடத்தில் சென்று அஞ்சலி செலுத்தவுள்ளார்.