மேட்டூர் அனல்மின் நிலையத்தில் மீண்டும் மின்உற்பத்தி தொடக்கம்

சேலம் மாவட்டம் மேட்டூரில் 600 மெகாவாட் மின் உற்பத்தி திறன் கொண்ட புதிய அனல்மின் நிலையம் இயங்கி வருகிறது. இந்த அனல்மின் நிலையத்தில் நிர்வாக காரணங்களுக்காக மின் உற்பத்தி கடந்த 13-ந் தேதி நிறுத்தப்பட்டது. இதை தொடர்ந்து நேற்று காலை முதல் மீண்டும் இந்த அனல்மின் நிலையத்தில் மின் உற்பத்தி தொடங்கி உள்ளது. இதேபோன்று தலா 210 மெகாவாட் மின் உற்பத்தி திறன் கொண்ட 4 யூனிட்டுகளுடன் செயல்பட்டு வரும் பழைய அனல்மின் நிலையத்தில் கடந்த 3 நாட்களாக 2-வது யூனிட்டில் மட்டும் மின் உற்பத்தி நடைபெற்று வந்தது. தொடர்ந்து நேற்று காலை 1-வது யூனிட்டில் மின் உற்பத்தி தொடங்கப்பட்டுள்ளது. அதாவது 840 மெகாவாட் மின் உற்பத்தி தரும் கொண்ட இந்த அனல்மின் நிலையத்தில் மீண்டும் 420 மெகாவாட் மின் உற்பத்தி நடைபெற்று வருகிறது என்பது குறிப்பிடத்தக்கது.