கார்கில் வெற்றி தின விழா புதுச்சேரி அரசு சார்பில் அனுசரிப்பு

1999-ஆம் ஆண்டு பாகிஸ்தான் உடன் நடைபெற்ற கார்கில் போரில் இந்தியா வெற்றி பெற்றது. இந்த போரில் நாட்டிற்காக உயிர் தியாகம் செய்த ராணுவ வீரர்களை போற்றும் வகையில் ஆண்டுதோறும் ஜூலை 26-ஆம் தேதியன்று கார்கில் வெற்றி தினம் கொண்டாடப்பட்டு வருகிறது.

இந்நிலையில் இன்று புதுச்சேரி அரசு சார்பில் கடற்கரை சாலையில் நடைபெற்ற கார்கில் வெற்றி தின விழாவில், முதலமைச்சர் ரங்கசாமி கலந்துகொண்டு கார்கில் நினைவு தூணுக்கு மலர் வளையம் வைத்து மரியாதை செலுத்தினார். அவரை தொடர்ந்து, சபாநாயகர் செல்வம், துணை சபாநாயகர் ராஜவேலு, அமைச்சர்கள் நமச்சிவாயம், திருமுருகன், டிஜிபி ஸ்ரீ நிவாஸ், காவல்துறை அதிகாரிகள், ராணுவ அதிகாரிகள் மற்றும் முன்னாள் ராணுவத்தினர் கலந்துகொண்டு கார்கில் நினைவு சின்னத்திற்க்கு மலர் வளையம் வைத்து மரியாதை செலுத்தினர்.

அதனை தொடர்ந்து கார்கில் போரில் பங்கேற்ற புதுச்சேரியை சேர்ந்த ராணுவ வீரர்களுக்கு முதலமைச்சர் ரங்கசாமி சால்வை அணிவித்து, நினைவு பரிசு வழங்கி கவுரவித்தார்.