சர்வீஸ் சாலையில் மின்விளக்குகள் அமைக்க கோரிக்கை

குமாரபாளையம் கத்தேரி பிரிவு பகுதியில் அன்றாட வேலைக்கு செல்பவர்கள், வட்டமலை எதிர்மேடு பகுதியில் உள்ள எண்ணற்ற  கல்லூரிகளில் கல்வி பயிலும் மாணவ, மாணவியர்கள் சேலம் கோவை புறவழிச்சாலையை கடந்து சென்று வந்தனர். இதனால் அடிக்கடி விபத்துக்கள் ஏற்பட்டு பலரும் உயிரிழந்து வந்தனர்.
ஆனால் கத்தேரி பிரிவு சர்வீஸ் சாலை வளைவு பகுதியில் பிளெக்ஸ் பேனர்கள், கொடிக்கம்பங்கள், கடை விளம்பரங்கள் என ஆக்கிரமிப்புகள் அதிகம் உள்ளது. இதனால் அனைத்து வாகனங்களும் நீண்ட வரிசையில் நின்று ஊர்ந்து செல்லும் நிலை ஏற்பட்டுள்ளது. இது கால விரயம், எரிபொருள் விரயத்தை ஏற்படுத்துகிறது.  

குமாரபாளையம் ஜவுளி உற்பத்திக்கு தேவையான நூல்களை ஏற்றி வரும் லாரிகள், இதர கடைகளுக்கு சாமான்கள் ஏற்றிவரும் சரக்கு வாகனங்கள், சேலம், திருச்செங்கோடு, சங்ககிரி,  நாமக்கல் உள்ளிட்ட பகுதிக்கு செல்லும் பேருந்துகள் குமாரபாளையம் நகரிலிருந்து சேலம் அரசு மருத்துவமனைக்கு செல்லும் ஆம்புலன்ஸ்கள் என பல வாகன ஓட்டிகளும் சிரமம் அடைகின்றனர். இரவு நேரங்களில் இந்த சர்வீஸ் சாலைகளில் மின் விளக்குகள் இல்லாததால், சாலையின் மேடு பள்ளங்கள் தெரியாமல் வாகன ஓட்டிகள் தடுமாறி விபத்தில் சிக்குகிறார்கள். எனவே, வாகன விபத்துக்கள் ஏற்படாமல் தடுக்க மின் விளக்குகள் அமைக்க நடவடிக்கை எடுக்க வேண்டும் என வாகன ஓட்டிகள் கோரிக்கை விடுத்துள்ளனர்.