மாமன்ற சுயேச்சை உறுப்பினா் இடைநீக்கத்திற்கு என்ன காரணம்

மதுரை மாநகராட்சி 62-ஆவது வாா்டு சுயேச்சை உறுப்பினா் ஜெயச்சந்திரன் தாக்கல் செய்த மனு:

கடந்த இரண்டரை ஆண்டுகளாக எந்த ஒரு அரசியல் கட்சியையும் சாராத சுயேச்சை மாமன்ற உறுப்பினராக செயல்பட்டு வருகிறேன். எனது வாா்டு பொதுமக்களுக்கு பல்வேறு அடிப்படை வசதிகளை செய்து கொடுத்து வருகிறேன். இதற்காக மாநகராட்சி நிதியை எதிா்பாா்த்து காத்திருக்காமல், எனது சொந்த நிதியையும் செலவழித்து வருகிறேன். கடந்த மாதம் 28- ஆம் தேதி மாமன்ற கூட்டம் நடைபெற்றது. அதில் நான் தகாத வாா்த்தைகளைப் பயன்படுத்தியதாகக் கூறி, என்னை இடைநீக்கம் செய்து குறிப்பாணை (நோட்டீஸ்) அனுப்பினா்.

என் மீதான குற்றச்சாட்டுகளுக்கு உரிய விளக்கம் அளிக்க வாய்ப்பு அளிக்கவில்லை. இது சட்ட விரோதம். எனவே, என்னை இடைநீக்கம் செய்த மதுரை மாநகராட்சி நிா்வாக அறிவிப்பை ரத்து செய்து உத்தரவிட வேண்டும் என அவா் கோரியிருந்தாா்.

இந்த வழக்கு நீதிபதி ஜி. ஆா். சுவாமிநாதன் முன் விசாரணைக்கு வந்தது.

அப்போது அரசுத் தரப்பில், மனுதாரா் மாமன்றத்தில் அவதூறாக பேசியது தொடா்பான பதிவுகள் உள்ளன. அதன்பேரில் அவா் மீது நடவடிக்கை மேற்கொள்ளப்பட்டதாகத் தெரிவிக்கப்பட்டது.

இதைப் பதிவு செய்த உயா்நீதிமன்ற நீதிபதி பிறப்பித்த உத்தரவு: மனுதாரா் மீதான குற்றச்சாட்டுகளுக்கு உரிய ஆதாரங்கள் உள்ளனவா? இந்த வழக்கு குறித்து மாநகராட்சி தரப்பில் பதிலளிக்க வேண்டும் என்றாாா்.