உத்திரமேரூரில் நாய் தொல்லை அதிகரிப்பு

உத்திரமேரூர் பேரூராட்சி பஜார் வீதியை ஒட்டியுள்ள செங்குந்தர் பிள்ளையர் கோவில் தெரு, மிஷின் ஸ்கூல் தெரு, வெள்ளை செட்டி தெரு, கவியரசு கண்ணதாசன் தெரு உள்ளிட்ட பல்வேறு தெருக்களில், 100க்கும் மேற்பட்ட தெரு நாய்கள் உள்ளன. கூட்டமாக சுற்றித்திரியும் தெரு நாய்களால், இப்பகுதியில் காலை, மாலையில் நடைபயிற்சி மேற்கொள்வோர், இவ்வழியாக பள்ளிக்கு செல்லும் மாணவ- - மாணவியர் அச்சத்துடன் செல்கின்றனர்.

இத்தெருக்களுக்கு புதிதாக வருவோரை தெருநாய்கள் குரைத்தபடியே விரட்டிச் செல்கின்றன. மேலும், தெருக்களில் உள்ள குப்பையை நாய்கள் கிளறும்போது, உணவுக்காக ஒன்றுக்கொன்று சண்டை ஏற்பட்டு குறுக்கும் நெடுக்குமாக ஓடும் நாய்களால், இருசக்கர வாகன ஓட்டிகள், பாதசாரிகள் விபத்தில் சிக்குகின்றனர்.

எனவே, உத்திரமேரூரில் பொதுமக்களை அச்சுறுத்தும் வகையில் தொல்லை கொடுக்கும் வகையில் சுற்றித்திரியும் தெருநாய்களை பிடிக்க பேரூராட்சி நிர்வாகம் நடவடிக்கை எடுக்க வேண்டும் என, கோரிக்கை எழுந்துள்ளது.