தர்மபுரி: கிணற்றில் தவறி விழுந்த விவசாயி உயிரிழப்பு

தர்மபுரி மாவட்டம், பாலக்கோடு சட்டமன்ற தொகுதிக்கு உட்பட்ட மாரண்டஅள்ளி அடுத்த வளைகாரப்பட்டி கிராமத்தை சேர்ந்தவர் சுப்ரமணி (59) விவசாயி. அசோகன் என்பவரின் நிலத்தின் வழியாக இவர் தினமும் தன்னுடைய நிலத்திற்கு சென்று வருவது வழக்கம். இன்று (ஜூன் 4) காலை தனது நிலத்திற்கு சென்றவர், நீண்ட நேரமாகியும் வீடு திரும்பவில்லை. 

இதையடுத்து அவருடைய மகன் சிவன், சுப்ரமணியை தேடி சென்றார். அப்போது அங்கிருந்த கிணறு அருகே சுப்ரமணியின் காலணி இருந்தது. இதனால் அதிர்ச்சி அடைந்த சிவன் பாலக்கோடு தீயணைப்பு துறைக்கு தெரிவித்தார். அங்கு விரைந்து வந்த தீயணைப்பு துறையினர் கிணற்றில் இறங்கி சுப்ரமணியை தேடினர். 

அப்போது சுப்ரமணி கிணற்றில் தவறி விழுந்து இறந்தது தெரிய வந்தது. பின்னர் அவரது உடலை மீட்டு தர்மபுரி அரசு மருத்துவ கல்லூரி மருத்துவமனைக்கு பிரேத பரிசோதனைக்காக அனுப்பி வைத்தனர். இந்த சம்பவம் குறித்து மாரண்டஅள்ளி காவலர்கள் வழக்குப்பதிவு செய்து விசாரணை நடத்தி வருகின்றனர்