கோவை: மொபட்டில் இருந்து தவறி விழுந்தவர் பலி

கோவை செந்தாம்பாளையம் கோகுலம் கார்டனை சேர்ந்தவர் கண்ணன்(52). இவர் நேற்று முன்தினம் மொபட்டில் சிவந்திராஜ் என்பவருடன் சென்று கொண்டிருந்தார். கண்ணன் பைக்கை ஓட்ட, சிவந்திராஜ் பின்னால் இருந்தார். அவர்கள் பீளமேட்டில் உள்ள தனியார் மருத்துவமனை அருகே சென்றபோது, நிலைதடுமாறி இருவரும் பைக்கில் இருந்து கீழே விழுந்தனர்.

இதில் சிவந்திராஜ் லேசான காயத்துடன் உயிர் தப்பினார். கண்ணனுக்கு தலை உள்ளிட்ட இடங்களில் பலத்த காயம் ஏற்பட்டது. இதனையடுத்து அந்த வழியாக சென்றவர்கள் கண்ணனை மீட்டு அருகே உள்ள தனியார் மருத்துவமனையில் சேர்த்தனர். அங்கு சிகிச்சைக்கு பின்னர் வீடு திரும்பினார். இதனையடுத்து நேற்று அவரது உடல் நிலை மோசமாகி சுய நினைவை இழந்தார். குடும்பத்தினர் அவரை தனியார் மருத்துவமனைக்கு கொண்டு சென்றனர்.

ஆனால் அவரை பரிசோதித்த டாக்டர்கள் அவர் வரும் வழியிலேயே இறந்து விட்டதாக தெரிவித்தனர். இது குறித்து கோவை கிழக்கு போக்குவரத்து புலனாய்வு பிரிவு போலீசார் வழக்குப்பதிவு செய்து விசாரித்து வருகின்றனர்.