சூலூர்: 500 மரங்கள் நடவு செய்து பசுமைப் புரட்சி!

தமிழக அரசின் பசுமைத் திட்டத்திற்கு வலு சேர்க்கும் வகையில், கோவையைச் சேர்ந்த 250 கல்லூரி மாணவிகள் இணைந்து, பள்ளபாளையம் குளக்கரையில் இன்று 500 மரக்கன்றுகளை நட்டுள்ளனர். நாவல், புங்கம், அரச மரம், மகாகனி உள்ளிட்ட பல்வேறு வகை மரக்கன்றுகளை ஒரே நேரத்தில் நடவு செய்த மாணவிகள், சுற்றுச்சூழல் பாதுகாப்பின் அவசியத்தை வலியுறுத்தினர். இந்த நிகழ்ச்சியை துவக்கி வைத்த பள்ளபாளையம் பேரூராட்சி தலைவர் செல்வராஜ், மாணவிகளின் முயற்சியை பாராட்டினார். இது குறித்து பேசிய கல்லூரி மாணவிகள், தமிழக அரசின் பசுமைத் திட்டத்தை ஆதரித்து, நாங்களும் எங்களது பங்களிப்பை அளிக்க விரும்பினோம். மரங்கள் நம்மை ஆரோக்கியமாக வைத்திருப்பதுடன், சுற்றுச்சூழலையும் பாதுகாக்கின்றன. எனவே, ஒவ்வொருவரும் பொது தேவைக்காக ஒரு மரம் வெட்டும் போது மூன்று மரங்களை நட்டு பசுமைப் புரட்சியில் பங்கேற்போம் என தெரிவித்தனர். இந்த நிகழ்வு, கோவையில் பசுமை அறிவுணர்வை ஏற்படுத்தியுள்ளது.