கோவை: பள்ளி மாணவியை பாலியல் தொல்லை செய்த ஆட்டோ ஓட்டுநர் கைது

கோவை, மதுக்கரை ஊராட்சி ஒன்றிய அலுவலகத்துக்கு எதிரில் உள்ள பகுதியைச் சேர்ந்த 7-ம் வகுப்பு மாணவியை பாலியல் தொல்லை செய்ததாக ஆட்டோ ஓட்டுநர் (39) கைது செய்யப்பட்டுள்ளார். தினமும் மாணவிகளை பள்ளிக்கு அழைத்துச் செல்லும் பழக்கம் கொண்ட ஜெபராஜ், நேற்று காலை வழக்கம் போல் அந்த மாணவியை பள்ளிக்கு அழைத்துச் செல்லும் வழியில் வீட்டுக்கு அழைத்துச் சென்று பாலியல் தொல்லை கொடுத்துள்ளார். மாணவி கதறியதால் அவளை சமாதானப்படுத்தி பள்ளியில் விட்டுவிட்டுச் சென்றார். மாணவி இதுகுறித்து ஆசிரியரிடம் தெரிவித்ததையடுத்து, பெற்றோருக்கு தகவல் தெரிவிக்கப்பட்டது. பின்னர் பேரூர் அனைத்து மகளிர் காவல் நிலையத்தில் புகார் அளிக்கப்பட்டது. போக்சோ சட்டத்தின் கீழ் வழக்கு பதிவு செய்த காவல்துறையினர் ஜெபராஜை கைது செய்து, கோவை மத்திய சிறையில் அடைத்தனர். இச்சம்பவம் பெரும் அதிர்ச்சியை ஏற்படுத்தியுள்ளது.